13 tawo nadakpan sa SACLEO sa Liloan

CEBU, Philippines — Nadakpan sa kapolisan sa Liloan Police Station ang 13 ka mga tawo tungod sa lainlaing mga kalapasan sa balaod nga ilang nahimo sulod sa tulo ka adlaw nga Simultaneous Anti- Crimiality Law Enforcement Operation (SACLEO) nga nagsugod sa Hulyo 2 hangtod sa Hulyo 4, 2025.

Si Police Major Mawi Arcilla, hepe sa Liloan Police Station miingon nga naglakip sa ilang nadakpan ang pusher og shabu nga si alyas Tito, 43 anyos nga taga Poblacion nga nakuhaan kini og 0.2 gramo nga shabu nga nagkantidad og P1, 700.

Dugang nadakpan sa kapolisan sa Liloan Police Station ang siyam ka tawo nga naglakip sa tulo ka mga babayeng naaktohan nga nagpasiugda og illegal nga swertres.

Nasakmit sa kapolisan gikan sa maong mga dinakpan ang illegal nga suwertres gambling paraphernalia sama sa mga stubs nga adunay kombinasyon sa tulo ka numero, ballpen, calculators ug uban pa.

Samtang sa Wanted Persons, duha ka tawo nga adunay kaso sa kalapasnsan Act Lasciviousness ug ang laing usa adunay kasong murder ang ilang nasikop.

Si Arcilla miingon nga ang maong dinakpan ang gitanggong karon sa ilang detention cell sa Liloan Police Station ug gikatakda sila dad-on sa korte karong adlawa aron ipresentar sa korte nga nag-isyu sa warrant of arrest. — /IBM (BANAT NEWS)