Mobile clinics sugdan og deploy ni Baricuatro

CEBU, Philippines — Sa pagtuman sa iyang saad sa kampanya nga mahatud ang serbisyo medikal bisan sa mga hilit nga lugar, gipahibalo ni Cebu Governor Pamela “Pam” Baricuatro ang paglusad sa mga mobile clinic sa tibuok probinsya, nga magsugod sa Camotes Island.

Matud ni Provincial Assistant Administrator Aldwin Empaces nga hapit na mahuman ang ilang sabotsabot aron masugdan ang maong inisyatiba, nga kabahin sa 100-day agenda ni Baricuatro.

“We are working on a partner now and finalizing it. The first site would be in Camotes,” matud ni Empaces.

Kining mga mobile clinics modalit og serbisyong diagnostics ug basic health services sama sa X-ray, blood pressure monitoring, diabetes testing, ug dental checkups. Ang inisyal nga rollout sa mobile clinics anha himuon sa mga isla nga komunidad, uban ang Camotes isip pilot area, unya isunod ang ubang lugar sa amihanang bahin sa probinsya.

Sumala ni Empaces, ang maong paningkamot kabahin sa 100-day rollback plan sa administrasyon ni Baricuatro, nga nagtumong sa pag-assess ug pagpaspas sa implementasyon sa mga programa base sa 2025 annual budget.

Ang mobile clinic gigamitan og pundo nga gi-allocate sa nangaging administrasyon.

Gipaspasan nila ang proseso sa pagplano tungod kay daghan pa ang kinahanglan buhaton aron ma-align kini sa mga pamalaod ug sumbanan sa DILG.

Sa laing pakighinabi, si Dr. Nicole Elisse Catalan, anak ug healthcare consultant ni Governor Baricuatro, miingon kini nga ilang target nga ma-deploy ang unang mobile clinics sugod Lunes, Hulyo 7.

Ang mobile clinics kabahin sa mas lapad nga panan-aw sa integrated healthcare system sa probinsya.  Sa milabay, misaad si Baricuatro sa pagpalambo sa mga district ug provincial hospitals, ilabi na sa suplay sa tambal ug uban pang medical equipment.

Aron masuportahan ang mga mobile clinic, usa usab ka “mobile kitchen” program ang gihunahuna nga ipatuman, aron motabang sa pagkaon ug nutrisyon. (CEBU NEWS)