Pagminus sa paggamit og plastic gimando ni Chan

CEBU, Philippines — Gipatuman karon sa kagamhanan sa siyudad sa Lapu-Lapu ang pag-minus sa paggamit og single-use plastics nga maoy usa sa duha ka memorandum nga giluwatan ni Mayor Cindi King-Chan sa iyang unang adlaw nga pag-asumer isip mayor sa siyudad.

Naglakip niini ang memorandum no. 001-2025 ngadto sa mga kawani sa kagamhanan aron pagmintinar sa kalimpiyo sa palibot.

Suma pa ni Mayor Chan nga gikinahanglan kini nga himoon tungod kay ang ilang dakbayan maoy sentro sa turismo dinhi sa Sugbo.

Lakip sa ilang tinguha mao ang pag-recycle sa mga water bottles aron dili na masulod sa mga kanal nga resulta sa pagpataka og labay sa katawhan.

Ang mga kawani sa kagamhanan gidasig usab sa pagdala og ilang kaugalingong sudlanan sa tubig ug dili mopalit og mga mineral water aron kaminusan ang basura nga plastic.

Gimanduan usab ang mga food vendors nga dili na mogamit og plastic nga putos sa ilang mga baligya nga pagkaon.

Sa ikaduha niyang memorandum mao ang pag-recycle sa mga promotional tarpaulins nga makita nga gibutang sa center islands, street posts, skywalks, city hall lobby, ug uban pa nga buhatan ug gikinahanglan karon nga matangtang ug ma-recycle. (BANAT NEWS)