Pekeng mga buntis, kawatan diay

CEBU, Philippines — Nabalhog sa prisuhan sa Mambaling Police Station 11 Cebu City Police Office ang upat ka mga babayeng taga Bacolod City human nasakpan nga nangawat sa usa ka dakong tindahan sa F. Llamas Street corner N. Bacalso, Barangay Basak San Nicolas, Cebu City niadtong Sabado sa gabii, Hunyo 28, 2025.  Ang mga nadakpan mao sila si Jacky Aquino Dela Cruz, 30; Kieth Samson Hinlo, 29; Shane Serio Alpar, 30 , pulos mga taga Barangay Singcang, Bacolod City, Negros Occidental ug Carla Mendez Silva, 38, taga Purok Pag-asa, Barangay Alijis, Bacolod City, Negros Occidental.

Nasayran nga duha sa upat ang nagsul-ob og girdle aron ingnon nga mabdos, apan ang sud ilang tiyan 78 ka sachet sa powdered juices nga  nagkantidad og kapin P5,000.

Giangkon nila nga ibaligya nila nga gikawat nga items.  Gisubay sab sa Mambaling Police Station 11 kun nag boarding house ba sa siyudad sa Sugbo ang grupo. (BANAT NEWS)