Miatake sa polis napusilan sa Talisay

CEBU, Philippines — Napusilan sa tiil ang usa ka 39-anyos nga lalaki human agresibong miatake sa mga sakop sa Special Weapons and Tactics (SWAT) sa Dakbayan sa Talisay diha sa sitio Kimwa, Lurok Camansilis, Barangay Jaclupan niadtong miaging adlaw.

Ang suspek mao si alyas Eugene, 39, nagpuyo sa nahisgutang lugar. Si Patrolman Raffy Rempojo, imbestigador sa Talisay City Police Station niingon nga usa ka reklamante ang mitawag sa buhatan sa kapolisan kay ang iyang sakyanan ang gibato sa suspek.

Niresponde ang grupo sa SWAT ug ilang naabtan ang suspek. Ila unta kining dakpon apan nagmagahi ug agresibo kaayo. Ilaha kining gihangyo nga motahan  apan nisulod kini sa ilang panimay.

Pagkataud-taod nigawas kini og balik nga nagbitbit na og sundang ug matud pa agresibong nidasdas sa usa sa mga SWAT ug gitigbas kini duha ka higayon, swerteng pulos sa dughan ang igo sa polis apan nasalbar sa iyang gisuot nga vest.

Tungod ani, napugos ang SWAT sa pagpusil sa suspek diha sa iyang tiil hangtud nga nikalma kini.

Gidala sa tambalanan ang suspetsado nga hangtud karon padayon nga nagpaalim. Gikatakda nga mopasaka og kaso ang kapolisan batok sa dinakpan.

Wala pa sab matino sa kapolisan kun unsay rason nganong namato ang suspek. (BANAT NEWS)