Disqualification case batok ni Baricuatro dili molampos

CEBU, Philippines — Masaligon si Atty. Ferdinand Topacio abogado ni governor-elect Pamela Baricuatro nga dili molampos ang disqualification case nga gipasaka batok sa midaug nga governor. Nagkanayon si Topacio nga wala kini kalambigitan sa giingong unauthorized election survey nga maoy gitumbok nga reklamo sa nagtinguha nga ma nullify ang iyang kadaugan sa niaging eleksyon sa buwan sa Mayo.

Lakip sa tulo ka butang nga maisip nga huyang ang kaso mao nga dili sakto ang pagpasaka sa kaso tungod kay didto gipasaka sa Comelec Regional Office Regional Director diin base sa Omnibus Election Code, ang maong reklamo angayan nga adto isang-at sa Clerk of the Commission o sa Commission’s Law Department og dili sa regional office.

Ikaduha mao ang kakuwang sa attribution diin napakyas ang reklamante sa pag-establisar sa bisan unsa nga koneksyon ug kun dili regular ang survey dili basehan para sa DQ ubos sa kasamtangan nga balaud.

Si Topacio midugang nga ang disqualification case usa ka “politically motivated and baseless harassment tactics” nga gitumong sa pagdaot sa kadaugan ni Baricuatro.

Samtang gitug-an ni Topacio nga giandam na usab ang paghimo og pelikula sa kinabuhi ni Baricuatro nga ipasalida karong tuiga sa mga senihan.

Si Alice Dixon ang giplanohan nga modala sa papel sa kinabuhi ni Baricuatro ug aduna na usab silay nakita nga modala sa papel ni outgoing Governor Gwendolyn Garcia. (BANAT NEWS)