50 ka miyembro sa gun-for-hire sikop
CEBU, Philippines — Niabot sa 50 ka miyembro sa 14 ka gun-for-hire groups nga gikatahong nag-operate sa Central Visayas ang nadakpan sukad niadtong Enero 2025 gikatahong major breakthrough sa Police Regional Office-7 ang on-going campaign aron mamenosan ang shooting incidents ug mapuhag ang organized violence sa rehiyon.
Base sa taho sa PRO-7 nga ang neutralized groups gilangkuban sa Nadera, Gido, Tañeza, Yllaya, Garciano, Ybañez, Marapoc, Manoy, Rusiana, Caballero, Bobong, Darryl, Llatona, ug Comaling.
Pipila sa nadakpan mao ang walo nga identified group leaders samtang 10 ka ubang miyembro ang na-neutralized atol sa armed confrontations tali sa law enforcement.
Nikabat ngadto sa 27 ka nagkalain-laing armas nga gituohang gigamit sa gun-for-hire activities ang nakompiska atol sa operasyon.
Dako og natampo sa maong kalamposan sa PRO-7 ang continuous effort aron mailhan ug mapuhag ang illegal gun manufacturing sites nga nag-supply og armas sa maong mga grupo.
Base sa intelligence report kadaghanan sa maong criminal organizations nagkuha sa ilang mga armas gikan sa clandestine facilities sa Central Visayas diin pipila niini konektado sa international arms trafficking.
Ang maong operational gains nagpakita sa full alignment sa PRO-7 sa marching orders ni Chief PNP Police General Nicolas Torre III kinsa nitataw nga gikinahanglan nga wagtangon ang syndicated violence ug proliferation sa loose firearms.
Sa laing bahin, nasikop sa kapolisan sa Mabolo Police Station ang usa ka lalaki kinsa gikatahong naghupot og ilegal nga armas kagahapon sa kadlawon diha sa Sitio Avocado, Barangay Lahug, Dakbayan sa Sugbo.
Ang suspetsado mao si alyas “Jhury”, 29, walay trabaho, residente sa Sitio Kawayanan, Barangay Lahug, Siyudad sa Sugbo. Nasakmit sa kapolisan gikan sa suspetsado ang kalibre .38 nga revolver nga dunay duha ka buhing bala.
Ang suspetsado nihimakak sa pasangil batok kaniya diin matud niini nga dili iyaha ang maong armas, gikatahong nakit-an kini sa kapolisan sulod sa ilang balay samtang natulog siya.
Matud sa suspek nga gipukaw siya sa mga polis ug gituohang gikan niya ang maong armas.
Ang suspetsado nangangkon nga mogamitay siya og ilegal nga drugas. Anthony Despi, CNU Intern, BDB BANAT NEWS
- Latest
















