Kapin P4M shabu nasakmit

CEBU, Philippines — Nadakpan sa mga operatiba sa Tagbilaran City Police Station Bohol Police Provincial Office (BPPO) ang duha ka mga drug suspects atol sa ilang buy-bust operation sa Purok-4, Barangay Cabawan, Tagbilaran City, Probinsya sa Bohol niadtong Sabado sa gabie, Hunyo 7, 2025.

Ang mga nadakpan mao sila si Climaco Luzon alyas Proco, 39, mekaniko ug nagpuyo sa Purok 3, Barangay Biking, Lungsod sa Dauis, Bohol ug si Wilbert Veloso alyas Doking, 38, taga Barangay Anislag, Lungsod sa Maribojoc, Bohol.

Nasakmit sa mga operatiba ang 500 grams nga shabu nga nagkantidad og P3.4 million.

Nasayran nga duha ka buwan gipaubos sa monitoring ang suspetsado ug nasuta nga maka dispose kini og 100 grams nga shabu kada semana.

Nahibaw-an sab nga si alyas Proco bodegero og illegal nga drugas samtang si alyas Doking kay player.

Ang duha parehong nadakpan na kaniadto sa kasong kalambigitan sa illegal nga drugas.

Samtang nadakpan sa hiniusang  operasyon PDEA Regional Special Enforcement Team ug Talisay City Police Station ang mag live-in partner atol sa ilang buy-bust operation sa Sitio Rattan, Barangay Tangke, Talisay City niadtong Sabado sa gabii, Hunyo 7, 2025.

Ang mga nadakpan mao sila si Jojie Delos Peros alyas Ekong, 48 anyos ug Elvie Badejos Rivera, 50 anyos, ang duha pulos taga Sitio Magay, Barangay Tangke, Talisay City.

Nakuhaan ang mga suspetsado og 100 grams nga shabu nga nagkantidad og P680,000. — /IBM (BANAT NEWS)