Pagbutang og command center gitinguha sa MCPO
CEBU, Philippines — Gitinguha karon sa Mandaue City Police Office (MCPO) ang pag-establisar sa ilang kaugalingong command center alang sa pagpalambo sa ilang pagtubag sa alarma sa krimen o ilegal nga kalihokan ug pagsanong sa direktiba sa bag-ong chief PNP.
Matud pa sa tigpamaba sa MCPO nga si Police Lieutenant Colonel Mercy Villaro nga dugang pa nga tinguha nga kahatagan og katumanan ang three minutes nga gilatid ni PNP Chief General Nicolas Torre III nga pagtubag sa kapolisan sa mga alarma nga panghitabo nga ipadangat ngadto kanila.
Ang giplano nilang command center maoy magsilbi nga central hub alang sareal time monitoring ug dinaliang deployment sa mga sakop sa kapolisan sa panahon sa emerhensiya.
Sa kasamtangan ang MCPO nagsalig lamang gayod sa City Disaster Risk Reduction ang Management Office (CDRRMO) sa pag-access sa CCTV network sa Siyudad sa Mandaue.
Matud pa ni Villaro kon makabaton na usab unya ang MCPO sa maong susamang kahimanan dako kini og ikatabang nga mapalambo pa ang ilang kapasidad sa pagtubag sa mga panginahanglan og kapolisan sa mga molopyo sa kabarangayan.
Gitataw ni Villaro nga ang plano sa MCPO nga pag-establisar og kaugalingong command center ang naduso na nila sa kagamhanan sa dakbayan sa Mandaue isip pagsubay usab sa katuyoan sa Police Regional Office 7 nga ipatuman ang dinaliang pagtubag sa kapolisan sa mga gialarma sa ilang buhatan. (BANAT NEWS)
- Latest
