Naninghag, gipusil patay

CEBU, Philippines — Patay ang usa ka tricyle driver human gipusil sa matud pa sa iyahang amigo kay nasuko nga iyaha kining gisinghagan samtang sila nag-inom diha sa Purok Caimito, Barangay Langtad, Lungsod sa Argao niadtong Sabado sa gabii, Mayo 30, 2025.

Ang biktima mao si Retchelo Templa, 33, residente sa Sitio Caimito, Barangay Langtad, Lungsod sa Argao.

Samtang ang suspek mao si Kim "Boy" Ruiz, hingkod ang panuigon ug nagpuyo sa Sitio Magkabayo, Barangay Capio-an sa maong lungsod.

Ang Argao Municipal Police Station nakadawat og tawag gikan sa concerned citizen labot sa nahitabong pagpamusil sa dapit ug girespondehan dayon kini sa kapulisan.

Pag-abot sa kapulisan sa lugar naabtan nila ang biktima nga nagbuy-od atubangan sa panimalay sa iyahang igsuon.

Base sa imbestigasyon sa Argao Municipal Police Station nga alas 10:20 sa gabii anang adlawa ang biktima ug ang mga witness nga sila si Noel Sarvida, 44, ug Ericson Labajo, 4, nagtabi diha sa lugar.

Gikatahong niduol kanila ang suspek ug diretsong nibunot og armas ug gipusil ang biktima nga maoy hinungdan sa hinanaling kamatayon niini.

Nasuta sab sa imbestigasyon sa kapolisan nga sa wala pa nahitabo ang pagpamusil nag-inom ang biktima ug ang suspek didto sa Barangay Talaytay sanglit birthday man sa inahan sa biktima.

Apan samtang sila nag-inom giingong nasinghagan matud pa sa biktima ang suspek hinungdan nga nagkalalis sila ug nagkasumbagay.

Niuli sa Barangay Langtad ang biktima apan gisundan kini matod pa sa suspek ug gipusil sa dughan.

Misibat ang suspetsado apan dali kining nasikop sa hot pursuit operation ang Argao Police Station inabagan sa kabanay niini diha sa Barangay Capio-an.

Kasong murder ang ipasaka batok sa suspetsado nga nagtingkagol na karon sa prisohan. — /IBM (BANAT NEWS)