Duha patay sa bangga sa motor

CEBU, Philippines —  Duha ang patay sa duha ka aksidente nga nahitabo sa Dakbayan sa Sugbu ug sa Mandaue kagahapong adlawa.

Nakabsan sa kinabuhi ang driver sa motorsiklo human kini mibangga sa Ford pick-up sa diha sa flyover sa Governor Cuenco Avenue duol sa TESDA alas 3 sa kaadlawon kagahapon, Mayo 31, 2025.

Ang nakalas mao si Daryl Curiba, 31, taga Barangay Buhisan ning siyudad ug driver sa Yamaha vega motorcycle. Samtang ang sakay Ford pick-up mao ang magtiayon nga taga Nasipit Road sa barangay Talamban ning siyudad.

Ang drayber nag-edad og 48 anyos samtang ang pasahero nga iyahang kapikas sa kinabuhi nag-edad og 47 anyos.

Sa imbestigasyon sa Traffic Enforcement Unit sa Cebu City Police Office(CCPO) ang motorsiklo nagdagan agi sa flyover paingon Barangay Luz samtang ang pick-up nagdagan sa kasugat nga lane padung sa Barangay Banilad.

Samtang gadagan naabot ang motorsiklo sa curved section ug giingong ni-overshoot kini ug ni-counterflow sa pikas lane hinungdan nga nabangga sa atubangan sa pickup nga iyang kasugat.

Tungod sa kakusog sa pagbangga nibaliwliw ang drayber sa motor ug nalabay kini sa motorsiklo hinungdan sa grabeng kadaut sa kalawasan niini. Gidala ang biktima sa Chong Hua Hospital apan gideklarar kining dead-on-arrival sa nag-atiman nga doktor.

Hinoon, nagkasabot ra ang pamilya sa biktima ug ang mga sakay sa sakyanan ug dili na mopasaka og kaso.

Samtang sa laing aksidente, patay  ang usa ka guwardiya  nga milabang sa atbang nga bahin sa karsada  sa A.S.  Fortuna sa Barangay Banilad, Siyudad sa Mandaue sa dihang nadasmagan sa  naghaguros nga motorsiklo alas-6 sa buntag.

Matud pa nagdali ang rider kay ma late sa iyang trabaho sa Cebu City.

Ang guwardiya  sa usa ka display  center nga si  Ricardo Villanueva duol sa nahitaboan maoy miila sa gwardiya nga kini mao si Joseph Gabutan nga iyang kauban nga night shift ug padulong na kining mopauli. Dugang pa ni Villanueva nga wala siya makakita sa pagdasmag kay nangandam na siya sa trabaho isip relibo sa namatay apan nakadungog siya og lagubo ug sa iyang pagtan-aw nagligdas na sa dalan si Gabutan ug wala nay panimuot.

Hinuon mitahan sa iyang kaugalingon ngadto sa Traffic Enforcement Unit sa Mandaue City Police Office (MCPO) ang drayber sa motor.

Kini mipasangil nga kalit nga nilabang sa karsada si Gabutan ug uwahi na niya kining nabantayan. Giangkon niya nga kumpiyansa ra siya sa pagpadagan kay hawan man ang karsada anang mga orasa

 Gitanggong karon sa detention cell  sa MCPO  ang motorcycle rider nga nakadasmag  sa biktima ug kasong reckless imprudence resulting to homicide ang giandam sa kapolisan batok niini