Call center agent nakuhaag armas ug shabu

CEBU, Philippines —  Gibalhog sa prisohan ang usa ka 41-anyos nga lalake human kini nadakpan sa Oplan Bulabog sa kapulisan sa Mambaling Police Station 11 Cebu City Police Office diha sa Tabasca Street, Barangay Basak San Nicolas, dakbayan sa Sugbo kagahapon sa kadlawon, Sabado, Mayo 31, 2025.

Ang nadakpan mao si alyas Venom, 41, call center agent, taga Sitio San Roque, Barangay Basak San Nicolas ning siyudad.

Nasayran ang kapulisan sa Mambaling Police Station 11 pinangulohan ni Police Lieutenant Lyndon Mondragon nihimo og intensified Police Operation batok sa tanang matang sa illegal nga kalihukan sa maong dapit subay na sa Oplan Bulabog.

Niresulta kini sa pagkasikop sa suspetsado human naaktuhan kini nga nagdala matod pa og drugas ug armas.

Ang mga ebidensiya nga nasakmit gilangkuban sa duha ka gagmay nga sachet sa gituohang shabu nga nitimbang og .10 grams nga nagkantidad og P680 ingon man .357 kalibre rebolber nga dunay upat ka bala.

Giandam na sa kapulisan ang tukmang kaso nga ipasaka batok sa suspetsado.

Samtang nadakpan sab sa mga operatiba sa Tagbilaran City Police Station Bohol Police Provincial Office (BPPO) ang usa ka mangihaway og baboy atol sa ilang buy-bust operation sa Upper Sto. Niño, Purok-2, Barangay Dao, Tagbilaran City, Probinsya sa Bohol sa miaging adlaw.

Ang nadakpan mao si Reynante Salamanca, 47, lumad nga taga Pagina Seawall, Lungsod sa Jagna, Probinsyano sa Bohol.  Nasayran ang Tagbilaran City Police Station nagpahigayon og buy-bust operation sa dapit nga miresulta sa pagkasikop sa suspetsado.

Nakuhaan ang suspek og 25 gramos nga shabu nga nagkantidad og P170,000.

Usa ka buwan nga gipaubos sa monitoring ang suspect ug nasuta nga maka dispose kini og 50 gramos nga shabu kada semana.

Kasong kalapasan sa Republic Act 9165 ang ipasaka batok sa suspetsado.