Panaglalis mitumaw atol sa session sa Provincial Board

CEBU, Philippines — Sa labing unang higayon, mitumaw ang dakong panaglalis sa mga miyembro sa Sangguniang Panlalawigan (SP) atol sa regular session niini kagahapong adlawa.

Ang lalis mahitungod sa pamahayag ni bokal John Ismael Borgonia sa tersero distrito kalabot sa pagduso sa supplemental budget number 1 sa General Fund, atol sa special session sa niaging semana nga wala matuki tungod sa kakulang sa quorom mga provincial board members.

Si Borgonia nagkanayon nga dili siya gustong mahimong kabahin sa pagpasar sa P1.2 billion Supplemental Budget tungod kay kini gihimo “in bad faith” ug makaapekto sa incoming administrasyon ni Governor-elect Pamela Baricuatro.

Ang maong pamahayag ni Borgonia wala nauyoni sa pipila ka miyembro sa SP ilabina ni Association of Barangay Council (ABC) Presidente Celestino “Tining” Martinez.

Matud ni Martinez, ang maong SP nahimo na nuon nga “hot topic” sa mainstream ug social media nga nasamotan pa sa pamahayag ni Borgonia nga gihulagway niya nga “malisyoso”

Si bokal Victoria “Tata”Corominas Toribio nagkanayon usab nga ang pamahayag ni Borgonia nakapawala sa katungod sa mga bokal nga mobarog sa ilang kaugalingong opinion kalabot sa giduso nga lakang.

Atol sa regular session sa provincial board wala maapil sa calendar of business ang maong supplemental budget tungod kay gibalik man sa Committee on Budget and Appropriations ngadto sa Office of the Governor ang maong proposed supplemental budget alang sa dugang review ug assessment.

Mao usab kini ang hinungdan nga gidefer ni Borgonia ang iyang resolusyon pag-awhag sa iyang mga kauban nga bokal nga ilangan una ang diskusyon ug deliberation sa maong supplemental budget.

Gidepensahan ni Martinez ang maong supplemental budget ug nagkanayon nga ang maong pundo dili lang alang sa padayon nga operasyon sa kasamtangang administrasyon, mosuporta usab kini sa bag-ong mga miyembro sa Sangguniang Panlalawigan nga adunay duha ka bag-ong miyembro, gikan sa lone district sa Mandaue nga walay existing budget hangtod sa katapusan sa tuig 2025.

Taliwala sa ilang lalis ang mga bokal misaad sa publiko nga ang ilang aksyon mosubay sa ilang tinguha sa pagsiguro sa hapsay ug transparent nga transition sa umaabot nga administrasyon.

Ang regular session sa provincial board kagahapon, gisaksihan sa mga supporters ni Governor-elect Pamela Baricuatro kinsa miawhag sa mga bokal nga pugngan ang pagpasar sa P1.2 billion supplemental budget nga ilang gihulgway nga “midnight deal”. (BANAT NEWS)