Upat nasikop sa managlahing buy bust operation  

CEBU, Philippines — Nadakpan sa mga operatiba sa Carcar City Police Station ang usa ka high value individual ug mga kauban niini sa ilang buy-bust operation sa sitio Ibabao, Barangay Perrelos, dakbayan sa Carcar niadtong Mayo 7, 2025.

Ang mga nadakpan mao sila si alyas Jonathan, 39 anyos, minyo, taga Barangay Candaguit, Lungsod sa Sibonga ug maoy subject sa buy-bust operation; alyas Crismarie, 25 anyos, taga Barangay Bagasawi, Lungsod sa Tuburan ug si alyas Clyde, 22 anyos, molopyo sa Barangay Tipolo, dakbayan sa Mandaue.

Nasakmit sa mga operatiba gikan sa mga suspetsado ang 30.55 grams nga shabu nga nagkantidad og P207,740 ingon man calibre .45 nga armas nga dunay magazine ug duha ka buhing bala. Ang maong operasyon resulta kini sa impormasyon nga nadawat sa kapolisan labot sa illegal nga kalihukan sa mga suspetsado.

Kasong kalapasan sa Republic Act 9165, Republic Act 10591 ug COMELEC Gun Ban ang ipasaka batok sa mga suspetsado.

Samtang usa ka 37 anyos usab ang nasikop sa buy bust operation sa kapolisan sa Mandaue sa sitio Pilit sa Barangay Cabancalan dakbayan sa Mandaue.

Ang kapolisan sa Presinto 4 sa Mandaue City Police Office (MCPO) ang nakakuha og impormasyon labot sa ilegal nga kalihokan sa 37 anyos nga si alyas Pulong nga maoy nakaaghat nila sa pagpahigayon og buy bust operation.

Nasakmit atol sa operasyon mao ang 30 gramo nga shabu nga nagkantidad og P204, 000.00 base sa Dangerous Drug Board (DDB) value niini.  MEL BANAT NEWS