Firetruck vs Duha ka motor

CEBU, Philippines — Naangol ang driver ug angkas sa usa ka motorsiklo human nagbangga sa usa ka fire truck nga padulong unta moresponde og sunog diha sa intersection sa C. Padilla Street ug T. Abella Street, Barangay San Nicolas Proper, Siyudad sa Sugbo niadtong Sabado sa hapon, Mayo 3, 2025.  Ang mga naangol mao ang driver sa Honda motorcycle nga si alyas Ron, 28 anyos, minyo, taga Bangkerohan, Tayud, Lungsod sa Consolacion ug angkas niini nga si alyas Ralph, 29, molopyo sa Tayud, Lungsod sa Consolacion.

Samtang ang driver sa Sawang Calero Firetruck mao si alyas Victor, 44 anyos, residente sa General Gines Street, Barangay Sawang Calero, Cebu City.  Nabangga sab ang usa ka NMax motorcycle sa  maong firetruck nga gimaneho ni alyas Jan, 30 anyos, taga Sitio Fatima, Barangay Kamagayan, Cebu City.

Base sa imbestigasyon sa Traffic Enforcement Unit sa Cebu City Police Office(CCPO) base traffic sketch, estorya sa mga nalambigit sa disgrasya ingon man sa CCTV footage nga ni-viral sa social media ang firetruck nagdagan sa T. Abella Street  nga naka-hazard ug nag wangwang tungod kay moresponde kini og sunog sa Dream Green Village, Barangay Guadalupe, Cebu City.

Samtang ang Honda ug NMax nga mga motorsiklo parehong nagbiyahe sa C. Padilla ug pa northbound.  Pag-abot sa intersection sa T. Abella ug C. Padilla Streets, nabangga ang NMax motorcycle sa wala nga bahin sa firetruck samtang ang Honda motorcycle nga dunay angkas nagbangga atubangan nga bahin sa firetruck.  Tungod sa impact, ang driver ug angkas niini nalagpot ug nangaangol.

Dali silang gidala sa Cebu City Medical Center aron matambalan.

Mialegar ang driver sa NMax nga si alyas Jan nga nag-una siya nilang alyas Ron ug alyas Ralph apan sa intersection giingong ni-overtake ang Honda motorcycle sa left side nga timing sab nga niagi ang firetruck. —/IBM (BANAT NEWS)