Disqualification case giatubang ni mayor Espinosa sa Santa Fe

CEBU, Philippines — Gipasakaan og disqualification case ang kasamtangang mayor sa lungsod sa Santa Fe, isla sa Bantayan nga si Ithamar Espinosa kinsa milansar balik pagka mayor sa maong lungsod.

Ang petitioner nga si Rey Dela Peña Jr., namasangil nga si Espinosa migamit sa mga Job Order nga empleyado alang sa iyang pangampanya.

Sa petition ni Dela Peña nga gisumiter ngadto sa Comelec, nagkanayon nga pipila ka higayon nga gimandoan nga motabang sa pag-andam alang sa caravan sa mayor ug uban pang election related nga mga kalihokan sama sa pag-andam og snacks ug motambong sa mga campaign rallies ang mga JOs.

Matud ni Dela Peña nga aduna pay kondisyon sa mga JOs nga dili moapil nga posilbleng dili ma renew ang kontrata isip Job Order.

Si Dela Peña miingon nga miabusar sa resources sa gobyerno pinaagi sa paggamit sa JOs sa iyang pangampanya si Espinosa.

Si Mayor Espinosa sa iyang tubag sa reklamo, mihulagway nga usa ka desperado ug tinuyo nga pagpangdaot lamang kini gikan sa usa ka kandidato nga buhaton ang tanan aron lang makadaog. Matud ni Espinosa nga walay basehan ang alegasyon nga siya nanghadlok sa mga JOs sa ilang pagboto ug pagsuporta.

Dugang ni Espinosa wala niya gigamit ang iyang position alang sa politikanhong pabor.

Si Dela Peña sumala sa mayor usa ka kanhi JO sa Munisipyo sa Santa Fe sa niaging tuig apan kini nag AWOL o nibiya sa serbisyo nga walay pananghid ug clearance ug giingong aktibo nga misuporta sa pikas nga kandidato.

Giawhag sa mayor ang mga botante nga dili magpadala sa mga pasangil nga iyang gihulagway nga walay kamatuoran. — /MEL (BANAT NEWS)