Code White Alert ang tibuok CV

CEBU, Philippines — Giisa sa Department of Health (DOH) Central Visayas ang Code White Alert sa rehiyon sugod Mayo 9 hangtod Mayo 13, 2025, isip kabahin sa pagpangandam sa 2025 Philippine Midterm National ug Local Elections.

Ang DOH mipagawas og Administrative Order No. 2008-0024 o naila nga Integrated Code Alert System for the Health Sector sugod May 09–13, 2025.

Ang Code White Alert, nagpasabot nga ang tanang ospital ug medical nga mga personnel kinahanglan nga andam kanunay, aron masiguro nga adunay igong serbisyo medikal, resources, ug mga quick response teams sa oras sa emerhensya. Nagkanayon ang DOH-7 nga ang alert giisyu pinaagi sa Regional Circular No. 2025-0046 kabahin sa ilang proaktibong mga lakang aron masiguro ang kaandam sa health services kun dunay mga emerhensya panahon sa eleksyon.

Gimandoan sa DOH-7 ang tanang local health officers ug medical facilities nga mag-standby ug ang mga personnel sa Disaster Risk Reduction and Management in Health (DRRMH) nga mag-monitor, mag-assess, ug magresponde dayon sa bisan unsang health incidents.

Ang mga health facilities gikinahanglan usab nga makigkoordinar sa DOH Regional Emergency Operations Center pinaagi sa mga dedicated hotlines alang sa hinanaling tabang. (BANAT NEWS)