State of emergency gideklarar nonot sa wa mahuman nga bridge project
CEBU, Philippines — Gideklarar sa konseho sa Dakbayan sa Sugbo nga ipaubos og state of emergency ang wala pa mahuman nga P28 million nga Reinforced Deck Girder Bridge sa Barangay Pulangbato.
Ang maong taytayan nanukad sa sitio Candarong paingon sa dalan sa Tanay ug naguba kini tungod sa Bagyong Odette niadtong Disyembre 2021 ug nisamot og kaguba pag-igo sa bagyong Agaton niadtong Abril 2022.
Gisugdan kini og ayo sa SBD Builders ug gikatakda unta nga mahuman niadtong Mayo 2024.
Tungod kay dili gihapon kini mapuslan, ang mga residente napugos og pangita og alternatibong dalan aron makalahus paingon sa ilang mga pinuy-anan apan matud pa ni Cebu City Mayor Raymond Alvin Garcia nga dili na kini luwas ilabi na og magsugod na ang ting-uwan.
Mao sab kini ang nakapa-aghat ni Konsehal Joel Garganera, chairman sa disaster nga aprubahan ang deklarasyon nga ipaubos na kini sa state of emergency aron nga malihok na ang taud-taud nga napasagdan nga proyekto. Ang Cebu City Disaster Risk Reduction and Management Council nisugyot nga tugutan ang Department of Engineering and Public Works (DEPW) nga makapadayon sa emergency procurement aron mapadali ang pagtukod sa maong bridge project.
Apan mipadayag og pagduha duha si Konsehal Jocelyn Pesquera bahin sa pagdalidali og pagpalit sa dinaliang gikinahanglan human nga adunay nay problema bahin sa basura kaniadto sa Bagyong Odette diin nameligro ang posisyon ni kanhi mayor Michael Rama lakip na ang pipila ka mga kawani nga nisangpot kini sa pagkataktak.
Gihimug-atan ni Pesquera nga ang sitwasyon karon mahimong dili kwalipikado nga usa ka emerhensya tungod kay ang mga deliberasyon sa isyu gisugdan na pipila ka mga buwan ang milabay ug ang DEPW wala pa motubag sa direktiba sa konseho bahin sa pagsumiter sa Program of Works and Estimates.
Nisuporta ra usab si Garganera nga dili una ipadayon ang emergency procurement provision kun dili maklaro ang gikinahanglang dokumentasyon gikan sa Committee on Infrastructure sa konseho sa siyudad. (BANAT NEWS)
- Latest
