Bana misuway og hostage sa iyang asawa

CEBU, Philippines — Gidakop ang usa ka construction worker human kini nag-amok ug gisuwayan og hostage ang iyahang asawa sa Purok 5, Barangay Cambitoon, Lungsod sa Inabanga, Probinsiya sa Bohol niadtong Martes sa buntag, Abril 29, 2025.

Ang dinakpan mao si alyas Gino, 55 anyos nagpuyo sa naasoy nga dapit samtang ang reklamante mao ang asawa niini nga si alyas Mirasol, 45 anyos, molopyo sa maong lugar.

Base sa impormasyon sa Inabanga Police Station, ang kapitan sa Barangay Cambitoon ni-report mahitungod sa nahitabong kagubot.

Ni responde dayon ang kapolisan pinangulohan sa ilang hepe Police Captain Albert Sator ug pag-abot nila sa lugar nakit-an ang suspect nga armado og lagaraw. 

Dihang nisuway ang otoridad sa pagduol sa suspect giingong nikisi-kisi kini ug nihimo og agresibong lihok nga nagpakita nga mosukol kini sa polis.

Tungod sa aksyon sa suspetsado napugos ang kapolisan sa pagdis-arma sa suspect.

Nakompiskar nila ang lagaraw nga dunay gitas-on nga 24 inches apil ang handle.

Nakaangkon og samad tinigbasan ang biktima og gidali pagdala sa Dagohoy Memorial Hospital. Sa imbestigasyon sa Inabanga Police Station gusto sa suspect nga paundangon iyang asawa sa trabaho nga mao ang pagbantay og bata kay matud pa gamay ra og sweldo ug siya nalang ang manarbaho.

Apan wala mosugot ang asawa nga maoy rason nga kini naghuramentado.

Kasong kalapasan sa Article 151, Alarm and Scandal ug Direct Assault ang gipasaka batok sa suspek. (BANAT NEWS)