Babaye gigulgol sa kapuyo

CEBU, Philippines — Patay ang usa ka 30- anyos nga babaye human gigulgol sa iyang kapuyo ang liog niini diha sa sulod sa ilang balay sa Barangay Poblacion, Dakbayan sa Talisay niadtong Sabado sa hapon.

Ang biktima mao si Annavone Orbiso De Jesus, 30, samtang ang suspek mao si Roston Gabulo Solon, 38, taga T. Padilla, Syudad sa Sugbo.

Sa inisyal nga imbestigasyon sa kapolisan nasuta nga nangaligo og dagat ang pamilya sa Larawan Beach sa Poblacion.

Nakainum matud pa ang suspek ug nahubo hangtud nga nitumaw ang panaglalis sa duha gumikan sa problema sa ilang pamilya.

Ang suspek nipasangil sa biktima nga nakasala kini kaniya kaniadto pero iya lang kini nga napasaylo. Wala hinuon gibutyag kun unsay sala nga nabuhat ang biktima aron siya patyon.

Ang suspek gikatahong nitug-an sa kapolisan nga bisan sa iyang pagpasaylo wala gihapon mag-usab ang biktima kay nagsige gihapon kini sa iyang pagpakasala.

Hangtud nga gusto nalang niya nga kuhaon ang ilang anak nianang adlawa, apan gikataho nga dili mosugot ang biktima.

Tungod kay nakainom ang suspek mitumaw ang ilang mainitong panaglalis ug naghinagitay hangtud nga nahitabo gyud nga gigulgol sa suspek ang liog niini.

Ang biktima gidala sa tambalanan pero gideklarar nga patay sa mga doktor.

Samtang ang suspek gidakop sa kapolisan sa Talisay. Ang igsuon sa biktima niangkon nga adunay deperensya ang relasyon iyang igsuon ug sa suspek gumikan sab sa pagkasala sa iyang igsuon.

Apan ang suspek magsige og balik-balik og hisgot niini ilabi na kung kini mahubog.

Ang suspetsado niingon nga wala siya magmahay sa iyang gibuhat ug atubangon ang iyang gihimo nga krimen. — /IBM (BANAT NEWS)