Borgonia walay partido nga nidala

CEBU, Philippines — Ang kakulang sa makinariya sa pangampaniya maoy gitumbok ni Bokal John Ismael Borgonia sa iyang pag-atras sa iyang kandidatura pagpapili og balik alang unta sa iyang ikatulong termino pagka-bokal sa ika-tulong distrito karong umaabot nga eleksiyon.

Si Borgonia kinsa niduso sa iyang certificate of candidacy (COC) niadtong Oktubre 7 sa niaging tuig ubos sa One Cebu party nangangkon nga niatras siya sa iyang kandidatura tungod kay wala na siya’y partido nga magdala kaniya.

Matud ni Borgonia nga sa kadako sa ika-tulong distrito nga gilangkuban sa Lungsod sa Balamban, Asturias, Tuburan, Pinamungajan, Aloguinsan, Barili ug Siyudad sa Toledo kinahanglang adunay igong resources ug organizational support sa pangampaniya.

Gibutyag ni Borgonia nga gikonsulta niya ang iyang pamilya ug team una pa siya nidesisyon.

"Rather than compromise the quality of my campaign and service, I have chosen to step back and focus on finishing my current term strong instead of pushing forward under difficult circumstances", padayag ni Borgonia diha sa iyang Facebook post niadtong Abril 19, 2025.

Samtang si Gobernador Gwendolyn Garcia nagdumili kini sa pagkomento sa pag-back out ni Borgonia ug nagkanayon nga adunay mga rason ang maong bokal.

Ug tungod kay napinal na ang Candidates Profile System (CPS) subay sa Automated Election System, matud sa Comelec nga dili na matangtang ang pangalan ni Borgonia sa official ballot ug sa certified list of candidates alang sa May 12 nga eleksiyon.

Ang iyang pangalan mabasa gihapon sa balota apan ang mga boto nga iyang makuha makonsidera kini nga "stray votes"

Sa pag-atras ni Borgonia sa iyang kandidatura tulo na lang ang kandidato pagka- bokal sa ika-tulong distrito nga sila si Julius Anthony Corominas sa One Cebu; Farid Baena sa Partido Federal ng Pilipinas (PFP) ug Dason Lorenz Lagon sa LAKAS-CMD. — /BDB (BANAT NEWS)