Polis nadakpan sa buybust

CEBU, Philippines — Usa ka aktibong polis ang nadakpan sa hiniusang mga operasyon sa operatiba sa Regional Drug Enforcement Unit-7, Regional Special Project Unit-7, Police Station 6, Police Station 11 Cebu City Police Office, PDEG SOU-7, RID-7, CDEU/CIU Mandaue City Police Office ug PDEA-7 atol sa ilang buy-bust operation sa C. Padilla Street, Barangay Mambaling, siyudad sa Sugbo, kagahapon sa buntag, Domingo, Abril 6, 2025.

Ang nadakpan mao 33 anyos nga polis nga nagpuyo sa Barangay San Vicente, Lungsod sa Liloan ug nadestino sa Police Station 6 sa Mandaue City Police Office.

Nasakmit gikan sa maong polis ang duha ka medium ug duha ka gagmay nga pakite sa gituohang shabu nga nagkantidad og kapin P400,000 ug uban pa.

Ang maong operasyon resulta kini sa impormasyon nga nadawat ang otoridad sa giingong illegal nga kalihukan niini.  Sa pagkutlo ning maong balita gipaabot pa ang pamahayag sa Mandaue City Police Office labot sa maong insidente.

Sa pikas bahin, niabot na sa P269.3 million ang balor sa illegal nga drugas nga nasakmit sa unang quarter sa 2025 ubos sa hurisdiksyon sa Police Regional Office-7.

Gikan sa Enero 1 hangtod sa Marso 31, 2025 ang kapolisan sa nagkadaiyang probinsiya sa Central Visayas nakakompiskar og 39,614.18 grams nga shabu nga nagkantidad og P269.3 million.

Gawas niini, nasakmit sab ang marijuana plants nga nagkantidad og P184,914.

Sa maong period, ang law enforcement agencies nakahimo og 2,171 operations nga miresulta sa pagdakop sa 2,481 individuals.

Ang maong ihap naglakip sa 151 high-value targets, 1,635 street-level dealers ug 695 newly identified drug suspects.  Si PRO-7 Regional Director Police Brigadier General Redrico Maranan miingon nga ang kalampusan sa maong mga operasyon resulta kini sa nagkalain-laing estratehiya ug kolaborasyon sa mga law enforcement agencies, epektibong intelligence deployment ug aktibong pagpanginlabot sa komunidad.

“This comprehensive strategy has been carefully developed not only to address and dismantle illegal drug networks but also to strengthen public safety and security and promote the health and well-being of our community," sigon ni Maranan. (BANAT NEWS)