Kusinero nag-sideline og shabu nadakpan

CEBU, Philippines —  Nadakpan sa mga operatiba sa Tagbilaran City Police Station Bohol Police Provincial Office (BPPO) ang usa ka high value individual atol sa ilang buy-bust operation sa Purok-4, Barangay Taloto, Tagbilaran City, Probinsya sa Bohol niadtong Biyernes sa hapon, Abril 4, 2025.

Ang nadakpan mao si Jobert Hingpit alyas Bolo, 31 anyos, minyo, restaurant cook, lumad nga taga Santa Cruz, Batuan, Bohol apan kasamtangan nga nagpuyo sa Tamblot Extension, Barangay Cogon, Tagbilaran City, Bohol.

Nasakmitan ang suspetsado og 1,600 grams nga shabu nga nibalor og P10.8 million.

Nasayran nga tulo ka semana gi-monitor sa kapulisan ang suspetsado human sila makadawat og impormasyon nga kini nalambigit sa illegal nga kalihukan.

Maka dispose matod pa ang suspect ug usa ka kilo nga shabu kada duha ka semana.

Ang area of disposal niini kay Tagbilaran City ug mga kasikbit nga mga lungsod.

Kasong kalapasan sa Section 5 ug 11, Article II sa Republic Act 9165 ang ipasaka batok sa suspetsado.