Gun for hire nadakpan atol sa drug bust

CEBU, Philippines —  Usa ka 30-anyos nga lalake nga ex-convict ang nadakpan sa mga operatiba sa Police Station 4 Lapu-Lapu City Police Office sa buy-bust operation sa Sitio Kolo, Barangay Basak, Dakbayan sa Lapu-Lapu, kagahapon sa buntag, Sabado, Abril 5, 2025.

Ang suspek mao si alyas Bani, 30, nagpuyo sa Sto. Niño, Barangay Basak, Lapu-Lapu City.  Nasakmitan ang suspetsado og 25 grams nga shabu nga nagkantidad og P170,000.

Gawas sa drugas nasakmitan sab siya og kalibre .45 nga armas nga dunay tulo ka buhing bala.

Matud pa ang suspetsado usa sab ka gun-for-hire. Giingong mao kini ang suspek sa  mga nahitabong pagpamusil ug pagpanulis sa dakbayan sa Lapu-Lapu.

Samtang tulo ka mga tawo ang nasikop sa gibungkag nga drug den human sa buy-bust operation sa mga tinugyanan sa PDEA Cebu Provincial Police Office ug Cebu City Police Office Station 7 diha sa Sitio Upper Sario, Barangay Bulacao ning Dakbayan sa Sugbo, niadtong Biyernes, Abril 4, 2025 sa alas 4:45 sa hapon.

Si PDEA-7 acting Regional Director II Alex Tablate niila sa suspetsado nga subject sa operasyon ang 58-anyos nga tigmentinar sa drug den u gang iyang mga parokyano nga usa ka truck boy ug sack sewer.

Nasakmit atol sa maong operation ang unom ka putos sa gituohang shabu nga motimbang og 15.09 grams nga gibana-bana mobalor og dul-an sa P103,000 sa buy-bust money ug kagamitan sa pagsuyop.

Sa pikas bahin, gipaslak sa detention cell sa Presinto sa Mandaue City Police Office (MCPO) ang usa ka babayeng senior citizen nga nadakpan tungod sa paghupot og usa ka paketeng shabu.

Si Police Major Jade Somugat, hepe sa Presinto 2 sa MCPO miingon nga nakadawat sila og impormasyon labot sa kalambigitan niini sa ilegal nga drugas  diha sa Back Matimco sa Barangay Subangdaku.

Tungod sa maong impormasyon, ilahang giobserbahan ang suspek ug sa dihang ila kining nakit-an, gisita nila kini ug girekisa ug nasakpan ang usa ka gamay nga putos sa gituohang shabu.

Matud pa sa kapolisan miangkon nga tiggamitan ang suspek og ilegal nga drugas aron pagwagtang sa iyang kakapoy sa pagsige og labada nga maoy iyang panginabuhian.(BANAT NEWS)