Department of Water Resources gisugyot nga tukoron

CEBU, Philippines —  Ang Partido sa Bagong Pilipino (PBP) Partylist nipadayag sa ilang legislative agenda nga nakatutok sa mga batakang panginahanglan sama sa tubig, road connectivity, healthcare, ug kuryente nga ilang giilang sukaranan sa usa ka matarong nga kinabuhi.

Nanguna sa maong kalihokan ang first nominee nga si Atty. Goyo Larrazabal, kanhi Commissioner sa Commission on Elections (Comelec), ug ang second nominee nga si Manuel “Beaver” Lopez Jr.

Atol sa ilang press conference, ang PBP nagduso sa pagtukod og Department of Water Resources aron motutok sa implementasyon sa mga polisiya ug mga institusyonal nga reporma.

Nisugyot ang partido og mga balaodnon aron awhagon ang barangay-level nga magtigum og tubig-ulan ug lig-on nga pakigtambayayong sa mga NGO aron makahatag og limpyo nga tubig.

Nagsugod na ang PBP sa pagpang-apod-apod og mga water filtration systems sa nagkalain-laing lugar sa nasod bisan wala pa nagsugod ang opisyal nga kampanya.

Sa laing bahin, tungod sa kakuwang sa mga medical professionals sa daghang barangay, ang PBP nagduso sa pagpalig-on sa Doctors to the Barrio program sa Department of Health.

Apil sa ilang gi-propose nga balaod ang pagpalapad sa medical scholarship programs sa DOH ug ang pagpaniguro nga adunay labing menos usa ka doktor kada lungsod, labi na sa mga kabukiran.

Nag-awhag usab ang PBP sa paggamit og digitized healthcare aron mapaayo ang pagdumala sa sakit ug ang accessibility sa serbisyo.

Dugang pa, ang PBP nag-awhag sa paggamit og kombinasyon sa tradisyonal ug renewable energy sources sama sa solar ug hangin aron masiguro ang lig-on nga suplay sa kuryente sa mga barangay. (BANAT NEWS)