107 tawo nadakpan sa kapolisan sa Minglanilla

CEBU, Philippines — Moabot 107 ka tawo ang nadakpan sa kapolisan sa lungsod sa Minglanilla sa nagkalain-laing kalapasan atol sa unang tulo ka buwan ning tuiga sumala pa sa opisyal sa lungsod.

Si Police Major Mark Don Alfred Leanza, hepe sa kapolisan sa Minglanilla miingon nga resulta kini sa gipangusgan nilang anti-crime operations sa unang kwarter ning tuiga.

Matud pa niya nga ang malampuson sa pagdakop sa mga tawo nga adunay kalapasan sa balaod tungod kini sa pagtabang sab sa komunidad.

Gikan sa buwan sa Enero hangtud sa Marso sila nakasikop og 27 ka wanted person. Nakadakop sab sila og lima ka sa focus crime, 21 ka criminal offense, 33 ka drug suspek ug 21 ka tawo nasikop sa ilegal nga sugal.

Wala milugak sa ilang bakus ang kapolisan ilabi na nga nagsingabot ang piniliay. Mas daghan nga operasyon nga ilang pagahimuon aron hapsay ug malinawon ang lungsod.

Sa pikas bahin, lima ka babaye ug usa ka lalaki nga usher sa ilegal nga swertres ang nasikop sa kapolisan sa Dakbayan sa Carcar ug Toledo.

Ang kapolisan dungan nga nihimo sa operasyon sa nagkalain-laing dapit sa siyudad. Sa Dakbayan sa Carcar, nasikop si Alberta Maning, 62 anyos didto sa sitio Bocung, Barangay Buenavista. Wa magdugay, nadakpan si Jocelyn Satuita, 33 anyos didto sa Proper Barangay Valencia.

Nisunod dayon ang bugtong lalaki nga usher nga si Froilan Enjada, 28 anyos didto sa sitio Tinaan, Barangay Valencia ug si Cadrina Tangaro, 44 anyos sa sitio Lunas, Barangay Calidngan.

Samtang sa Dakbayan sa Toledo, nasikop si Maricres Dequillo, 37 anyos didto sa Barangay Landing DAS ug si Merie Ann Abad, 30 anyos didto sa Hiring, Barangay DAS.

Ang mga dinakpan nakuhaan og nagkalain-laing paraphernalia sa pag isyu og ilegal swertres ingon man ilang kita. Padayon nga hugot ang kampanya sa kapolisan labot sa ilegal nga swertres sa probinsya sa Sugbo. IBM BANAT NEWS