Mga angay bantayan ug buhaton aron dili ma-heat stroke–DOH
CEBU, Philippines — Tungod sa pagsaka sa temperatura panahon sa mga bulan sa ting-init, ang Department of Health (DOH) Central Visayas Center for Health Development, nagpagawas og long-term guidelines tungod sa epekto niini sa mga tawo, eskwelahan, ug trabahoan.
Ang mga rekomendasyon, gilatid sa bag-ong gipagawas nga regional circular no. 2025-0040, nagtutok sa mga precautionary measure, mga management strategy, ug pagsagop og imprastraktura nga makasukol sa kainit.
Para sa extreme danger conditions, diin ang heat index moabot sa 52°C o mas taas pa, girekomendar nga kanselahon ang mga outdoor ug physically demanding activities sama sa field trips ug athletic events.
Kung moabot ang heat index tali sa 42°C ngadto sa 51°C o danger category, mas maayo nga limitahan ang mga kalihokan sa mga dunay mga balatian sa panglawas, i-reschedule ang mga event sa mga oras nga mas bugnaw, ug dugangan ang mga hydration break.
Ang mga tunghaan ug trabahoan mahimo usab nga mopili og alternatibong work ug learning arrangements.
Ang mga sintomas sa heat exhaustion naglakip sa core body temperature gikan sa 38.3°C ngadto sa 40°C; ang panit sa pasyente bugnaw ug gipaningot; uhaw; labad sa ulo, kakapoy, o magluya; pwedeng di maapektahan ilang panghunahuna apan dunay uban mawad-an gyud og panimuot, pagkalipong, maglibog; kasukaon o pagsuka- kalibang; ug paspas nga heart rate bisan normal nga presyon sa dugo.
Samtang ang heat stroke—giisip kini nga usa ka medical emergency— kun lapas na og 40.5°C ang temperatura sa lawas; grabeng nagsingot, namula, o uga.
Ang uban nga mga timailhan ug sintomas naglakip sa nausab nga mental status sama sa agitation, kaluya, delirium o coma, seizure, neurologic dysfunction, paspas nga pagginhawa, paspas nga heart rate, low blood pressure o mga timailhan ug sintomas sa pagdugo.
Kinahanglang dalion sila pagpabugnaw, huboan, pagbubo kanila og tubig, paypayan ug butangan og bugnaw nga nuog ang liog, ilok, ug bugan, ug paghatag og oral rehydration o paimnon dayun og tubig.
Kung dili gani maulian, mas maayong dad-on kini sa tambalanan.
Giawhag sa DOH ang publiko ang pagtanom og mga kahoy, pagsigurong dunay hangin nga makasulod sa balay o edipisyo, gamit og pintal nga reflective , magpatuman og mandatory hydration break, magdugang og water stations, ug magdasig sa heat acclimatization alang sa pisikal nga mga kalihokan.
Gipahinumdoman usab ang mga indibidwal nga magsul-ob og gaan nga sinina, magbutang og sunscreen, ug moinom kanunay og tubig. (BANAT NEWS)
- Latest















