Garcia mangayo og exemption sa Comelec

CEBU, Philippines —  Mangayo og Comelec exemption si Cebu City Mayor Raymond Alvin Garcia aron aduna siya’y gahum nga makatudlo og mga officers-in-charge (OICs) sa Bids and Awards Committee diin lima ka sakop sa maong departamento ang gi-dismiss sa buhatan sa Ombudsman kauban si kanhi mayor Michael Rama human kini gikatahong napamatud-an nga guilty sa kasong grave misconduct and conduct prejudicial to the best interest of the service tungod sa giingong iregular nga paghatag sa mga kontrata sa pagkolekta sa basura.

Kasamtangang gipaubos ang tanang lokal nga kagamhanan sa election ban diin usa sa dili mamahimong buhaton mao ang pagtudlo ug paghulip og mga tawo nga nagtrabaho sa kagamhanan.

Matud ni Garcia nga adunay department heads nga nalakip sa maong dismissal order mao nga kinahanglan kini niya nga hatagan og pagtagad nga walay mabakantehan nga posisyon ug aron dili mabalda ang trabaho sa city hall. Nakigtagbo na usab si Garcia kang Atty. Ferdinand Gujilde, regional election attorney sa Comelec ug gikatahong gipadayag ni Gujilde nga mamahimo ra nga ang mayor  mo-appoint ug mo-designate og tawo sa maong departamento apan kinahanglan nga mangayo og Comelec exemption aron mapaagi sa legal nga proseso.

Si Garcia nagkanayon nga paspas ang proseso niini tungod kay dili na kinahanglan pa nga moadto sa Comelec sa kaulohan aron nga mananghid nga adunay mamahimong kausaban sa mga tawo BAC.

Nasayran nga dinhi nalang sa regional office sa Comelec mosumiter sa mga gikinahanglan nga mga dokumento.

Ang mga dokumento kasamtangang gihikay ni Atty. Kristine Joyce Batucan, city adminsitrator ug isumiter kini sa dili pa matapos ang semana.

Gipugngan pa ni Garcia ang mga pangalan sa iyang mga ipangtudlo sa mga nabakanteng posisyon apan gipasalig niya nga maggikan kini sa samang departamento aron kahibalo na sa dagan sa trabaho.