10 ka balay naugdaw sa sunog
CEBU, Philippines — Sobra sa tunga sa milyon ka pesos ang danyos nga gibilin sa sunog nga niulbo sa Purok 4 Sitio Upper Torre, Barangay Inayawan ning Dakbayan sa Sugbo kagahapon sa hapon, Sabado, Marso 22,2025.
Ang sunog naglambigit og kabalayan nga giingong nagsugod sa panimalay ni Nicanor Abatayo.
Ang alarma sa sunog nadawat sa kabomberohan alas 4:26 sa hapon ug hingpit nga napawong alas 5:17. Niabot ngadto sa P600,000 ang danyos diin walay gikataho nga nakalas o naangol.
Napulo ka mga panimalay ang apektado diin walo ang hingpit nga naugdaw ug duha ang partial nga nakan-an sa kalayo nga gipuy-an og kinse ka pamilya.
Ang imbestigador sa Cebu City Fire Department FO1 Jayson Layar, padayon sa pagpahigayon sa ilang imbestigasyon sa hinungdan sa pag-ulbo sa maong sunog.
Ang Department of Social Welfare and Services nipahigayon na sa ilang pagpanguha og impormasyon sa mga apektado sa maong pag-ulbo sa sunog alang sa ayuda sa siyudad. (CEBU NEWS)
- Latest
