Tinun-an gitulis sa mga nag-motor

CEBU, Philippines — Usa ka 18-anyos nga lalake ang gitulis sa tulisan nga sakay og motorsiklo samtang naglakaw kini pauli diha sa Sitio Villa San Pedro, Barangay Basak Pardo, siyudad sa Sugbo, pasado alas 2 sa kadlawon kagahapon, Biyernes, Marso 21, 2025.

Base sa kuha sa CCTV sa barangay ang biktima nga 18 anyos, naglakaw sa dihang kalit lang niabot ang upat ka tulisan nga sakay og duha ka motorsiklo.

Ang backrider sa usa ka motorsiklo nakita sa CCTV nagsul-ob og itom nga jacket ug puti nga helmet ninaog ug giapas ang biktima.

Giduol sa suspek ang biktima ug gikuha ang cellphone ug ubang gamit sa biktima.

Adtong higayona nag video call sila, dihang napawong na ang videocall didto na niduol ang suspek, gitionan og armas ang biktima ug giingnan nga "ambi tanang gamit nimo."

Si Kapitan Dave Tumulak sa Barangay Basak nitug-an nga nabalaka siya sa maong panghitabo ug niawhag sa mga batan-on ilabi na tagdugay nga mauli nga mosayo sila sa pagpamauli ilabi na kung walay importante nga mga boluhaton ug lakton.

Sumala pa ni Tumulak, mas maayo nga kung maglakaw-lakaw sa dalan dili maggamit ug cellphone.

Si Police Lieutenant Colonel Maria Theresa Macatangay, Deputy City Director for Operations ug tigpamaba sa Cebu City Police Office miingon nga ilaha karong gisubay ang mga CCTV sa lugar aron matultolan ang mga tulisan.

Giawhag sa kapulisan ang publiko nga magbinantayon sa palibot ug dili magpagawas og butang nga makadani sa mga kriminal.  IBM BANAT NEWS