1,021 ka pangan sa voter`s list sa Palompon ipatangtang
CEBU, Philippines — Pormal nga nisang-at og reklamo ug petisyon ang mga residente sa 43 ka barangays sa Palompon, Leyte ngadto sa Commission on Election Region VIII aron tangtangon sa voter's list ang 1,021 voters nga nakompirmar nga patay na apil ang kanhi mayor sa lungsod Marcelo C. Oñate kinsa nitaliwan niadtong 2021.
Nakompirmar nga patay na ang mga indibidwal nga naapil sa listahan pinaagi sa affidavit of community members and/or certifications gikan sa Philippine Statistics Authority (PSA).
Niadtong Pebrero 17, 2025, ang grupo sa vigilant members gikan sa 43 ka barangay nagpadala og suwat kang Atty. Maria Corazon S. Montallana, Acting Assistant Regional Election Director sa COMELEC Region VIII nga nag-request sa kanselasyon sa 1,021 ka deceased voters.
Gilakip sab sa maong suwat ang ubang anomaliya sama sa registration sa 868 ka non-resident voters, double registration ug cancellation sa valid voters.
Niadtong Marso 3, 2025 usa ka formal request alang sa cancellation sa 1,021 dead voters ang gisang-at sa COMELEC Region VIII sa Tacloban City.
Sa pagkutlo ning maong balita wala pay tubag nga nadawat gikan sa COMELEC.
Sayo niini, napulo ka election cases ang gisang-at sa Municipal Trial Court of Palompon niadtong Pebrero 3, 2025 alang sa exclusion sa dead voters gikan sa voters' list apan giingong gi-dimissed dayon ni Judge Delia P. Noel-Bertulfo gumikan matod pa sa technical reasons, partikular na ang ilang compliance sa submission deadline. (BANAT NEWS)
- Latest
