Nalambigit sa pagbaligya sa bata mag-atubang og kaso  

CEBU, Philippines — Giandam na ang mga kasong ipasaka batok sa magtiayon sa Barangay Duljo Fatima apil ang ubang mga tawo nga nalambigit sa pagbaligya sa bata’ng bag-ong gihimugso.

Nasayran nga ang inahan sa bata nadala sa pampublikong tambalanan niadtong Pebrero 20, 2025 ug didto kini nanganak ug pagka-Marso 6, 2025 na-discharge gikan sa tambalanan ang maong inahan.

Ug sa maong adlaw usab nahitabo ang transaksiyon sa ginikanan sa bata ug middleman kuyog ang usa ka katabang ug gihimo kini gawas sa tambalanan.

Nasayran nga ang middleman maoy ni-settle sa bayranan sa ospital ug human mabayari nakagawas na ang bata.

Ang ginikanan sa bata ug ang katabang maoy nagkuyog paingon sa usa ka barangay sa siyudad sa south district.

Samtang ang middleman ug ang laing contact sa employer nisibat tungod kay ang amahan sa bata giingnan nga ang P57,000 ug ang P30,000 nga dugang adto ra ibayad sa ilang gipuy-an sa Barangay Duljo Fatima.

Subay sa maong hitabo, si Police Lieutenant Colonel Maria Theresa Macatangay, deputy city director for operations ug tigpamaba sa Cebu City Police Office nagkanayon nga ang Women and Children Protection Desk (WCPD) sa CCPO maoy nangulo sa imbestigasyon ilabi na sa pagkuha sa tanang ebidensiya ug pamahayag sa mga tawo nga nalambigit ug niresponde sa insidente.

Usa sa gisubay sa kapolisan ang kopya sa footages sa closed circuit television diin makita ang transaksiyon sa ginikanan ug middleman sa pampublikong tambalanan base sa impormasyon nga ilang nakuha.

Nasayran nga na-rescue ang gibaligya nga bata diha sa usa sa mga barangay sa siyudad sa south district niadtong Marso 7, 2025.

Ug sas maong adlaw usab nadakpan ang magtiayon tungod sa kasong illegal gambling ug giklaro ni Macatangay nga ang pagkasikop sa ginikanan sa gibaligya nga bata lahi nga operasyon diin gisikop sila tungod kay naaktohan nga nag tong-its nga usa ka matang sa sugal.

Ang magtiayaon og mga nalambigit sa pagbaligya sa bata posibleng mag-atubang og kasong human trafficking ug tan-awon usab sa kapolisan kon adunay gihimong simulation of birth nga illegal nga lakang.  Samtang ang kadagkoan sa Cebu City Medical Center nihatag og katin-awan nga walay nahitabong transaksiyon kalabot sa giingong pagpamaligya og bata sa usa ka inahan nga nanganak sa ilang tambalanan.

Kini ang giklaro ni Dr. Anton Oliver Reposar, hepe sa maong tambalanan.

Base sa talaan sa CCMC na-admit ang inahan niadtong Pebrero 20, 2025 diin sa maong adlaw kini nanganak ug nakagawas sila niadtong Marso 6 , 2025 sa alas 6:00 sa gabii giingong nalangay ang pagpagawas sa bata tungod kay aduna pay medical treatment. (BANAT NEWS)