Comelec nilugway sa application sa local absentee voting

CEBU, Philippines — Gilugwayan sa Commission on Elections (Comelec) og usa ka semana ang application period alang sa local absentee voting (LAV) nga nagtugot sa mga kwalipikadong botante nga magparehistro hangtud sa Lunes, Marso 17, 2025.

Pinaagi sa Resolution 11120 nga gipagawas gibalhin sa Comelec en banc ang kataposang adlaw sa pag-file sa aplikasyon sa LAV ngadto sa Marso 17 gikan sa Marso 10, 2025  base sa taho sa Philippine Star.

Ang local absentee voting nagtugot sa mga kawani sa gobiyerno, military, polis, ug mga media worker nga mo-duty atol sa adlaw sa piniliay sa pagbotar sa dili pa ang local and national elections (NLE) sa Mayo 12, 2025.

Ubos sa maong resolusyon gilugwayan usab ang deadline sa pag-verify sa eligibility sa mga aplikante gikan Abril 8 hangtud sa Abril 11, 2025.

Apan ang deadline sa pagpadala sa lista sa mga kwalipikado nga mga botante, mga balota ug uban pang materiyales sa eleksiyon ngadto sa mga hingtungdan nga buhatan nagpabilin nga dili molapas sa Abril 27, 2025.

Sa laing bahin, ang Comelec nagkanayon nga ang mga aplikasyon mahimong dili maaprobahan kong ang ngalan sa aplikante wala sa nasudnong listahan sa mga rehistradong botante, ang aplikasyon ulahi nga na-file, ang form dili ubos sa pagpanumpa, usa lang ka photocopy ang gisumite o kon ang certification portion sa LAV form no. 02 dili kompleto.

Naglakip sa resolusyon nga alang sa pipila ka kakulangan ang mga application form sa mga napamatud-ang rehistradong botante mahimong kompletohon/tumanon ug ipasa balik sa CLAV sa dili pa ang ulahing petsa sa pag-andam sa listahan sa kwalipikadong local absentee voters sa Abril 17, 2025."

Ang absentee voters gikatakdang mobotar gikan sa Abril 28 hangtud sa Abril 30, 2025. (BANAT NEWS)