Nagsumbagay nga drivers ipatawag sa LTO-7
CEBU, Philippines — Ang Land Transportation Office Central Visayas gikatakdang mopatawag sa duha ka mga drivers sa usa ka ride hailing app ug taxi driver nga nagsumbagay diha sa dalan Magallanes ning Dakbayan sa Sugbo, niadtong Sabado sa buntag.
Kini ang gibutyag ni LTO-7 Regional Director Glenn Galario nga nahinabi sa Banat News/DyRF1215.
Matud pa ni Galario, sa higayon nga mailhan ang duha nga nagsumbagay ilaha kini ipatawag pinaagi sa show cause order nga ipadala kanila subay sa due process ug alang sa imbestigasyon.
Sumala pa ni Galario, sa imbestigasyon nga ipahigayon sutaon kun kinsa sa duha ang dunay kalapasan sa balaod sa trapiko ug dili sila magpanuko pagsilot kanila.
Giawhag ni Galario ang mga drayber nga kung mahimo ipatuman gayud ang maximum tolerance diha sa kadalanan ilabi na karong nagkagrabe na ang kainit sa panahon aron malikayan ang posibleng kagubot sa kadalanan.
Ang pamahayag ni Galario, tubag sa nag trending nga viral video sa social media nga nagpakita sa sinukmagay sa duha tungod sa wala pa matino nga rason.
Atol sa maong sinukmagay gisuwayan pa kini sila ug uwang pinaagi sa pag-usig sa iro apan nagpadayon sila hangtud nga dunay mga tawong miuwang sa duha.
Ang maong video nakaani ug lain-lain nga reaksyon diha sa social media. — /IBM(BANAT NEWS)
- Latest
