Ex-convict nakuhaan og armas

CEBU, Philippines — Nadakpan sa kapulisan sa Mambaling Police Station 11 Cebu City Police Office(CCPO) ang usa ka 44-anyos nga lalake nga giingong ex-convict pinasikad sa search warrant Sitio Dap-dap, Barangay Mambaling, Siyudad sa Sugbo niadtong Sabado sa gabii, Marso 8, 2025.

Ang nadakpan mao si alyas Lyndon, 44 anyos, wala'y trabaho, nagpuyo sa naasoy nga dapit.

Si Anacleto Debalucos, Executive Judge sa Regional Trial Court Branch 17, Cebu City ang nag-issue sa search warrant.

Atol sa pagpatuman sa search warrant na-recover sa kapulisan gikan sa dinakpan ang usa ka kalibre .45 nga armas nga wala'y serial number ug magazine nga dunay duha ka bala.

Nasayran ang suspetsado usa ka ex-convict sa kasong concubinage ug gitumbok sab nga drug runner ug gidudahan sab kining gun-for-hire.

Kasong kalapasan sa Republic Act 10591 ang ipasaka batok sa suspetsado. — /IBM(BANAT NEWS)