Telco gihangyo pagsunod sa guidelines

CEBU, Philippines — Bisan sa giduso nga ordinansahon nga pagpatuman sa one-pole policy sa dakbayan sa Sugbo, ang legislative body nanawagan sa mga telecommunication companies sa pagsunod sa hustong guidelines sa pagbutang sa ilang cable wires.

Nahisgotan kini human naobserbahan sa pipila ka mga sakop sa konseho ang mga nagbitay nga kable hinungdan sa pagduso sa ordinansahon kabahin niini.

Kini ang nahisgotan atol sa public hearing sa ordinansahon alang sa one-pole policy sa Sugbo nga gipangamahanan ni Konsehal Jerry Guardo.

Si Guardo nipadyag nga bag-o lang naaprobahan sa konseho ang iyang ordinansa kabahin sa underground cabling.

Apan nakita gihapon niya ang pag-regulate sa overhead wires ilabi na sa interior portions sa barangay level.

Matud ni Guardo nga ang iyang ordinansa sa underground cabling naglangkub lang sa mga dagkong dalan sa siyudad.

Uban nga gisugyot nga ordinansa gilantaw ni Guardo nga usa ka hybrid nga solusyon aron matubag ang nagbitay nga mga wire o spaghetti wires.

Atol sa public hearing, si Arjay Dormido, representante sa DITO nipadayag og suporta sa gisugyot nga ordinansahon nga makapahapsay sa ilang mga proyekto ug makapagaan sa ilang mga installation operations. Gipasalig ni Dormido nga padayon nilang bantayan ang kalidad ug pagbutang sa ilang mga cable wire. — /BDB(BANAT NEWS)