Dul-an 100 ka balay naugdaw

Dili mominos sa 80 ka mga panimalay ang naugdaw sa duha ka insidente sa sunog nga nahitabo niadtong Biyernes sa gabii ug kagahapon sa hapon sa Mandaue City ug sa Talisay City.

Sa sunog sa Talisay, nahitabo kini sa Sitio Kabayoan 2, Barangay Laray San Roque Talisay City, Sabado sa hapon nga naglambigit sa kabalayan.

Gisusi karon sa kabomberohan nga kini giingong nagsugod sa panimalay sa usa ka Rona Baron pasado alas-3 sa hapon ug hingpit nga napawong alas-4:47 sa hapon, apan 41 ka mga balay ang matud pa naapektahan niini.

Matud pa ni Talisay City Fire Investigator Mar Dee Auxtero, ilaha pa susihon ang hinungdan sa pag-ulbo sa maong sunog kay giingong walay tawo ang maong panimalay kung asa nagsugod ang sunog.

Gibanabana nga nagbilin kini og P1,050,000.00 nga danyos ug gibanabanang 200 ka pamilya ang naapektahan. Matud pa niya, 37 ka balay ang hingpit nga naugdaw ug upat ang nakan-an sa kalayo.

Tungod sa kahagip-ot sa lugar gisumpay-sumpay nila ang ilang fire hose  aron makaabot sa sudlonong bahin diin nahitabo ang sunog.

Tan-awon pa usab sa kabomberohan kung pila usab sa mga panimalay nga nasunog ang iya taga Cebu City, tungod kay natunga kini ug ilang naklaro nga sa balay nga naa sa sud sa Talisay City nagsugod ang sunog.

Daghan sa mga residente sa maong dapit nga nasunogan ang walay nabitbit human sa kakalit sa hitabo, mga importante nga papeles lang ang kalab-anan nilang mga dala.

Mapasalamaton ra usab ang uban wala masunogi nga nakalingkawas pa sila sa trahedya ilabi na lisod kaayo karon panahona.

Usa sa ka Arjay Punay, kinsa kaduha na kahigayon nasunogan ang ilang pamilya karong tuiga pamahiyumon lang gihapon tungod kay matud pa niini kabubut-on man sa Ginoo ug padayon lang ug dili mawagtangan ug paglaum.

Ang tulo ka andana nga panimalay nila ni Punay ang nasunog karon, sa nilabay nga buwan sa Enero nasunog usab ang ilang patigayon.

Sunog sa Mandaue

Sa laing sunog, dili mominos sa 50 ka mga panimalay naapektahan sa sunog sa Sitio Papaya Manga, Barangay Ibabao-Estancia Mandaue City, niadtong Biyernes sa gabii.

Giingong nagsugod kini sa panimalay ni Anna Sumalinog.  Ang alarma sa sunog nadawat sa kabomberohan alas 7:19 ug napawong alas-8:23 sa gabii.

Ang sunog naglambigit usa usa ka one unit two-storey residential units nga nakaapektar sa 49 ka mga panimalay.

Gibana-bana moabot ngadto sa P500,000 ang danyos ug 500 ka individual usab ang apektado sa sunog.

Ang kabomberohan nga gipangulohan sa ground commander Fire Supt. Arnel Abella uban sa imbestigador na si FO1 Neil Ian Amancio, nipahigayon sa ilang imbestigasyon may kalabutan sa maong pag-ulbo sa sunog.

Sa talaan sa City Social Welfare and Services sa siyudad nakatala sila ug 86 pamilya o 350 ka individual.

Kasamtangan usa nga gipahimutang sa Barangay Ibabao Gym ang mga nasunogan. Ang mga nasunogan nahatagan gilayon og pagkaon, mga kagamitan sama sa habol, banig ug hygiene kit

Si Kongresista Lollypop Ouano-Dizon, nibutyag nga  hatagan nila ang dinalian nga tabang ang mga nasunogan.

Gawas sa ba-ong nasunogan, nakahatag na sab sila og ayuda sa mga nasunogan sa Barangay Mantuyong. (BANAT NEWS)