Nanghasi sa gasolinahan gidakop

CEBU, Philippines — Nabalhog sa prisuhan sa Minglanilla Police Station ang usa ka 33-anyos nga lalake human nagmugna og kasamok sa usa ka gasoline station sa Barangay Poblacion Ward 2, Lungsod sa Minglanilla niadtong Huwebes sa buntag, Marso 6, 2025.

Ang suspek mao si alyas Mamerto, nagpuyo sa Idaville Street, Sitio Tiber, Barangay Poblacion Ward 1 sa maong lungsod.

Samtang ang biktima mao si alyas Alwin, 35 anyos, manager sa maong gasolinahan nga taga Barangay Poblacion Ward 1, Minglanilla, Cebu.

Sa impormasyon sa Minglanilla Municipal Police Station ang biktima nga Manager sa JTB Gasoline Station ni-report sa police station labot sa usa ka lalake nga nanghasi sa gasoline station.

Matud pa nagsiyagit-syagit ug gihagit niini og away ang mga empleyado sa gasoline station ug gikuha ang fuel hoses ug giusikan ang gasolina nga nibalor og P2, 556.

Nakit-an sab nga ang suspetsado nagkupot matud pa og botelya.    Niabot ang mga police sa gasoline station ug dakpon unta ang suspetsado.

Apan sa wala pa nasikop ang suspect giingong nagkisikisi ug gitukmod ang usa sa mga polis nga moposas unta niya.

Gidala sa Minglanilla Police Station ang suspect ug gipasakaan kini og kasong Alarm and Scandal, Resistance and Disobedience to a Person in Authority ug Malicious Mischief. (BANAT NEWS)