Mga atleta nga moapil sa CVIRAA gihatagan og allowance
CEBU, Philippines — Gipanghatagan og uniporme ingon man allowance ang mga atleta sa siyudad sa Mandaue nga mosalmot sa Central Visayas Region Association (CVIRAA) 2025 nga pagahimoon sa Bayawan City sa Negros Oriental.
Kini maoy agig pagdasig sa mga atleta nga maoy mag representar sa siyudad sa ilang pagsalmot sa maong paugnat sa kusog.
Gihimo ang ceremonial turn-over sa paghatag sa uniforms ug allowance sa mga athlete nga gipanguluhan ni Mandaue City mayor Glenn Bercede ug City Councilor Malcolm Sanchez uban sa kadagkoan sa DepEd Mandaue, Coaches ug mga magtutudlo.
Ang maong mga atleta naggikan sa nagkalain-laing eskwelahan sa siyudad sa Mandaue.
Nasayran ang Mandaue City adunay kapin 600 ka mga atleta ug gihatagan sila og tag P2,500, sapatos, backpack, ug jacket aron ilang magamit sa ilang pagsalmot sa maong indigay sa paugnat sa kusog.
Si mayor Bercede sa iyang mensahe ang mipadayaag og mga pagdasig sa mga atleta ug sa tanan nga naglangkob niini apil na ang mga magtutudlo nga mouban sa delegasyon. (BANAT NEWS)
- Latest
