Galeos nitubag sa suwat ni Davide

CEBU, Philippines — Gitubag ni Kongresista Edsel Galeos ang sulat ni Bise Gobernador Hilario Davide III nga ni-call out sa kongresista tungod giingong pagpangdaot ni Galeos kang Davide nga walay nahimo dihang na gobernador kini sa Lalawigan sa Sugbo.

Sa open letter ni Davide ngadto sa kang Galeos ang nauna nitumbok sa iyang mga nahimong programa ug proyekto ilabi na sa mga proyekto sa imprastraktura nga nabubo ngadto sa ilang distrito atol sa iyang administrasyon.

Apan si Galeos, sa iyang sulat kang Davide nagkanayon nga ang sulat ni Davide gipadala sa wrong audience.

“It is not me whom you need to persuade of your purported achievements, but rather the people of the district – the very constituents who hold the power to evaluate and compare leadership”, matud ni Galeos sa iyang sulat ngadto kang Davide penetsahan niadtong Pebrero 24, 2025.

Matud ni Galeos nga ang mga tawo maoy mosukod sa ka epektibo sa panggobiyerno ni Davide kaniadto ug nidugang nga posilbeng nakompara usab sa mga tawo ang nahimo sa kanhi gobernador sulod sa iyang termino ug sa administrasyon karon ni Gobernador Gwendolyn Garcia.

“Their judgment is shaped not only by personal narratives but by tangible results and the impact on their daily lives”, ni Galeos pa, sa iyang suwat nga gi-post sa iyang opisyal nga Facebook page nga “Atong Amigo Edsel Galeos”.

Ug kabahin sa iyang performance isip kongresista sa segundo distrito, si Galeos nagkanayon nga nagpabilin siya nga mapasalamaton sa pagsalig ug kompiyansa kaniya sa mga konstituwente niini base sa positive nga ratings nga iyang nakuha.

Dugang ni Galeos nga padayon nga suporta sa mga taga 2nd district maoy nagsilbi nga validation ug motivation aron iyang mahimo ang iyang responsibilidad diha sa iyang distrito. BDB BANAT NEWS