Probinsiya nisaway sa CHED

CEBU, Philippines — Gisaad sa Commission on Higher Education (CHED) sa Central Visayas nga padayon ang commitment niini sa pakigtinabangay sa Probinsiya sa Sugbo.  Ang CHED-7 nipagawas og pamahayag human gi-censure o gisaway sa Provincial Development Council (PDC) ang regional director niini nga si Maura Consolacion Cristobal human kini nga wala motambong sa duha ka adlaw nga PDC meeting niadtong Marso 3 ngadto sa 4, 2025.

“There was no intention on the non-attendance of the 2nd day of the PDC”, esplika sa CHED-7.

Ug aron mapamatud-an ang commitment o pasalig sa ahensiya sa pagppalambo pa sa produktibo nga partnership uban sa Probinsiya sa Sugbo nihangyo ang CHED-7 nga makigtigom sa probinsiya ug nipadala na usab og sulat alang sa katin-awan sa isyu.

Niadtong Marso 4, 2025 gisaway sa PDC ang CHED-7 ilabi na ang regional director niini tungod kay wala kini magpakita atol sa tigom sa council diha sa Kapitolyo.

Ang council niduso og motion pag-censure kang Cristobal.

Si Gobernador Gwendolyn Garcia nagkanayon nga nagpadala sila og sulat imbitasyon sa tanang ahensiya kalabot sa himuong PDC meeting.

Adunay representante sa CHED nga nitambong sa unang adlaw sa tigom apan nihangyo ang council nga mismo ang regional director ang motambong aron maoy motubag sa mga pangutana sa opisyales.

Apan sa ikaduhang adlaw wala gihapon motambong ang labaw sa CHED-7 ug wala na’y nitungha nga representante sa ahensiya hinungdan nga ilaha kining gi-censure.

Matud ni Garcia nga higayon na unta kadto sa regional director sa CHED-7 nga makatubag sa mga pangutana ug concerns sa mga mayor.

Ang CHED ra usab ang ahensiya nga wala makapresentar sa ilang mga programs, activities, and projects (PAPs) alang sa Probinsiya sa Sugbo sa tuig 2026 ngadto sa council. (BANAT NEWS)