Cebu City nag-groundbreaking na sa underground cable project

CEBU, Philippines — Sa dili madugay, dili na unya makita ang mga overhead cable sa Dakbayan sa Sugbo human nga pormal na nga gipahigayon ang groundbreaking ceremony alang sa underground installation sa overhead cable wires.

Ang maong kalihokan gipangulohan ni Cebu City Mayor Raymond Alvin Garcia ug Konsehal Jerry Guardo diha sa Plaza Sugbo kagahapon, Marso 3, 2025.

Gitambongan ang maong kalihokan sa mga representante gikan sa mga telecommunications company DPWH-7 ug ubang opisyales sa kagamhanan.

Ang proyekto sa kagamhanan subay kini sa City Ordinance 2750 nga nagmando sa pagbutang sa mga linya sa kuryente, mga kable sa komunikasyon, ug mga linya sa telebisyon ug kable ngadto na sa ilawom sa yuta.

Ang pag-instalolar sa mga underground cable wire gisugdan na sa heritage district sa siyudad nga mao ang downtown area lakip ang palibot sa Plaza Sugbo, atubangan sa Cebu City Hall, Basilica Minore del Santo Niño de Cebu ug South Road Properties.

Lakip usab ang dalan P. Burgos, dalan M.C. Briones, Osmeña Boulevard ug dalan D. Jakosalem ang makasinati sa maong kalamboan.

Si Garcia nagkanayon nga sakit gyud sa mata ang mga spaghetti wire sa siyudad.

Gusto usab sa mayor nga ipatangtang ang mga spaghetti wire alang sa seguridad ug alang sa disaster resiliency diin atoll sa katalagman dili na kinahanglang mabalaka kon adunay mga masangit ug mangaputol nga mga wire.

Gipasalig ni Garcia nga iimplementar sa tibuok siyudad ang underground installation kon makita human sa duha ka buwan nga masugakod sa siyudad ang maong proyekto.

Samtang si Guardo nipadayag sa iyang kalipay nga naimplementar na gyud ang maong proyekto human kini giaprobahan sa konseho niadtong niaging tuig.

Naglaom si Guardo nga matrabaho kini sulod sa duha ka buwan aron mas hapsay ug mas limpiyo na tan-awon ang siyudad sa dili pa matapos ang iyang termino. (BANAT NEWS)