Ikatulong dakong sunog

CEBU, Philippines — Dili mominos sa 60 ka mga panimalay ug mga establisamentong namaligya og mga baboy nga litsonon ang apektado sa sunog nga niulbo sa may Zone 7, Barangay Mantuyong Mandaue City, kagahapon sa hapon adlaw nga Lunes, Marso 3,2025.

Ang maong sunog naglambigit kini og residential houses nga dunay mga litsonanan ug tangkal sa mga baboy nga litsunon.

Giingong  nagsugod kikni sa panimalay ni Teresita Garbo.  Ang alarma nadawat sa kabomberohan alas 2:56 ug hingpit nga napawong alas 4:42 na sa hapon.

Gibana-bana moabot P750,000 ang danyos sa maong sunog. Walay natala nga naangol o nakalas sa maong hitabo.

Matud pa ni Fire Officer 1 Niel Amancio, gituohan sa tag-iya sa panimalay nga kuryente ang hinungdan sa sunog.

Sa iyang pagbanabana moabot 60 ngadto sa 80 ka panimalay ang apektado sa maong sunog nga gibanabanang kapin 500 ka tawo ang apektado.

Ang mga residente sa dapit nibutyag nga butane ang hinungdan sa pag-ulbo sa sunog, apan wala pa kini kumpirmaha sa kabomberohan.

Si Barangay Kapitan Julius Ceasar Areopagita sa iyang pamahayag  miingon nga tulo ka blocks sa Zone 7 nga adunay  tag 20 ka mga panimay matag block niini ang naapektahan.

Maayo nalang nga wala kini makatabok sa kasigbit nga kabalayan sa Barangay Guizo tungod sa nag-uwang nga sapa.

Sagad sa mga panimalay ginama sa gaay nga materyales, nabantayan sab ang kakusog sa hangin anang orasa maong paspas ang pagkatap sa kalayo.

Samtang pipila sa mga nagnegosyo og litsonan sa lugar ang napugos sa pag-itsa sa ilang mga baboy ngadto sa sapa aron masalbar.

Si Garbo mitug-an sa mga tigbalita nga nagtan-aw og tv iyang bana sa ground floor sa dihang nakapanimaho kini og sunog.

Sa pagsaka niini sa ikaduhang andana nakita niini ang itom ug baga nga aso ug kalayo sa usa sa mga kwarto nga walay tawo.

Dali silang nanggawas sa balay ug walay nadalang gamit. Gihimakak sab niya ang pasangil nga butane ang sinugdanan niini kay wala sila gagamit niini sa pagluto.

Ang mga nasunogan kasamtangang gipahimutang sa Mantuyong Gym ug kung dili sila maigo didto, ibalhin ang uban sa Mandaue Central school.

Ang kapitan nitug-an nga upat na ka higayon nasunog ang maong dapit niadtong 1992, 2007, 2016 ug karon Marso 3, 2025.

Ang sunog kagahapon mao ang ikatulo nga dakong sunog nga niigo sa Metro Cebu sukad magsugod ang Fire Prevention Month. Unang niulbo ang sunog sa Lahug niadtong Marso 1, nasundan kini sa Mambaling Marso 2 ug kagahapon ang sa Mandaue City Marso 3. (BANAT NEWS)