Magtiayon gidakop tungod sa pagtinir og armas

CEBU, Philippines —  Nadakpan pinasikad sa search warrant ang magtiayon dihang gi-implementar sa kapulisan sa Balamban Municipal Police Station ug 64th Special Action Company sa Barangay Prenza, Lungsod sa Balamban niadtong Biyernes sa gabii, Pebrero 28, 2025.

Ang mga nadakpan ang magti-ayon nga alyas Mark, maoy subject sa warrant of arrest ug si alyas  Ronalyn nga iyang asawa nga giingong nisuway og babag sa mga polis.  Gi-implementar sa kapulisan ang search warrant nga gi-issue ni Judilyn Hugo Tapia-Menchavez, Presiding Judge sa Regional Trial Court-7, Toledo City batok kang alyas Mark tungod sa kasong kalapasan sa Republic Act 10591 o Comprehensive Firearms and Ammunition Regulation Act nga penetsahan Pebrero 24, 2025.

Mag-atubang sab sila  og kasong kalapasan sa Section 11 ug 12, Article II sa Republic Act 9165 human dunay nakuhaang ilegal nga drugas diha sa ilang balay.

Ang asawa nga si alyas Ronalyn gidakop tungod sa disobedience in person of authority and obstruction of justice.  Atol sa implementasyon sa search warrant nakasakmit ang otoridad og calibre .45 nga dunay magazine nga dunay lima ka bala.  Nasakmit sab ang sling bag ug usa ka medium size sa gituohang shabu ug unom ka aluminum foil ug lighter. (BANAT NEWS)