Agri-fishery project gitugyan sa DA ngadto sa Jagna Bohol

CEBU, Philippines —  Gi-turn over sa Department of Agriculture Central Visayas (DA-7) ang pipila ka proyekto sa agri-fishery nga adunay kinatibuk-ang kantidad nga P 261, 238,198.00 sa Jagna, Bohol niadtong Pebrero 28, 2025.

Sumala sa DA-7 ang kalihukan, pinangulohan ni Regional Executive Director (RED) Angel C. Enriquez, gidawat sa Local Government Unit sa Jagna, nga girepresentahan ni Mayor Joseph A. Rañola.

Ang turnover sa mga sertipiko sa proyekto maoy kabahin sa mga imprastraktura, kagamitan ug suporta sa produksiyon.

Kini nga mga proyekto naglakip sa usa ka nursery unit nga nagkantidad og P499,463.68 ug ang Naatang Spring Development project nga nagkantidad og P699,853.22 ubos sa National Organic Agriculture Program (NOAP); Canal Extension alang sa Capahan Spring Development nga nagkantidad og P1,972,854.34; hauling truck, post-harvest facility building, rice mill, ug recirculating dryer, nga nagkantidad og P11,500,000 nga gipundohan ubos sa National Rice Program (NRP).

Gawas niana duna usab gihatag nga mga fertilizer discount voucher (FDV) ubos sa NRP interventions, naglakip kini sa soil ameliorants nga nagkantidad og P483,530.00, biofertilizers nga nagkantidad og P623,037.75, ug inorganic fertilizers nga nagkantidad og P1,416,673.00.

Dugang pa, gihatagan usab og kontrata ang Jagna alang sa pagpalambo sa Potable Water System (PWS) ubos sa DA- Philippine Rural Development Project (PRDP) IBUILD Component nga nagkantidad og P244,042,785.80.

Ang DA-7 miingon nga kining PWS makatabang sa pagpalambo sa sistema sa suplay sa tubig, nga makabenepisyo sa lokal nga komunidad.

Sa ubang bahin, gipasalamatan ni Mayor Rañola ang DA-7 ug DA-PRDP sa paghatag niini nga mga proyekto sa ilang lokalidad, ilabina ang PWS nga maoy mosulbad sa dugay na nga isyu sa luwas nga tubig sa lungsod, mopauswag sa produksiyon sa agrikultura, ug moduso sa kalamboan sa probinsiya ug rehiyon.

Samtang, si Direktor Enriquez malaumon nga kini nga mga proyekto makapauswag sa agrikultura ug ekonomiya sa rehiyon, magsiguro sa seguridad sa pagkaon alang sa mga Pilipino ug mas mapalapdan pa ang inisyatibo sa ubang bahin sa rehiyon. Giawhag usab niya ang publiko sa pagreport sa mga sakit sa kahayupan ngadto sa mga awtoridad.