Solar power plant tukoron sa probinsiya sa sugbo

Gipangandaman karon sa Probinsiya sa Sugbo ang ipahigayon nga ground breaking ug capsule – laying ceremony sa itukod nga 150-megawatt solar plant sa lungsod sa Daanbantayan.

Ang maong groundbreaking gikatakda karong Marso 16 diin gipaabot nga motambong niini ang mga opisyal sa Department of Energy ug sa Acciona Energia, ang Spanish firm o kompaniya nga motukod ug mooperate sa maong solar power plant.

Si gobernador Gwendolyn Garcia nakigtagbo nila ni Daanbantayan Mayor Sun Shimura uban sa Cebu Police Provincial Office director Colonel Jovito Atanacio, ug mga representante sa Kapitolyo ug sa Acciona niadtong Pebrero 28, aron hisgotan ang mga detalye sa ipahigayon unya nga kalihokan.

Ang maong solar power plant itukod sa 187- ektarya nga luna sa Kapitolyo sa lungsod sa Daanbantayan diin gihulagway kini nga maoy labing una nga public-private partnership sa solar power generation nga gipangulohan sa usa ka LGU.

Ang maong dakong proyekto gipaabot nga makahatag og benepisyo sa LGU sa Daanbantayan, ilabina sa kita sa kuryente, ug paghatag og trabaho sa mga residente sa lungsod.

Samtang ang probinsya sa Sugbo makakolekta usab og bayad sa renta kun abangan sa maong propedad, porsyento sa kita sa kuryente ug brokerage fees.