Nataligam-ang kandila

CEBU, Philippines — Kandila nga nataligam-an ang gidudahang hinungdan sa pag-ulbo sa sunod sa sitio San Vicente, Barangay Lahug sa Dakbayan sa Sugbu niadtong Huwebes sa gabii nga niugdaw ug nidanyos og dili mominos sa 50 ka mga panimalay.

Ang sunog giingong nagsugod sa panimalay ni Edwin Escandallo pasado alas 6 sa gabii ug hingpit napawong pasado alas 9 na sa gabii. Gibana-bana nga moabot ngadto sa P1.2 milyon ang danyos sa maong sunog diin walay natala nga nakalas o naangol.

Matud pa 70 ka pamilya o 280 ka individual ang apektado sa maong sunog nga kasamtangang gipasilong karon sa Lahug Elementary School evacuation center. Ang mga nasunogan mialegar nga nagduda silang kandila nga nataligam-an maoy hinungdan niini kay naputlan og kuryente ang maong balay ug nasunog na kini kaniadto apan natabang dayon.

Kadaghanan sa mga nasunogan walay nabitbit nga gamit tungod sa kakalit ug kahagip-ot sa ilang  lugar.

Ang kabomberohan mohimo og imbestigasyon  bahin sa report nga kandila ang hinungdan niini.

Si Kapitan Hazel Muaña miingon nga nagpatawag na sila og tigum aron matabangan ang mga nasunogan.

Ang pangulo sa Department of Social Welfare and Services Portia Basmayor miingon nga 57 ka panimalay ang apektado, 88 ka pamilya o 344 ka tawo ang nabiktima nga ilaha nang nahatagan og food packs. IBM BANAT NEWS