Davide walay nahimo isip gobernador kaniadto?

CEBU, Philippines — Gisaway ni Bise Gobernador Hilario Davide III ang giingong pagpangdaot kaniya ni Kongresista Edsel Galeos sa segundo distrito.

Si Davide ug Galeos magkaatbang kini isip kongresista karong umaabot eleksiyon sa Mayo 2025 sa ilang distrito.

Si Davide nipadala kini og suwat ngadto kang Galeos sa pagtubag sa pasangil niini nga siya walay nahimo dihang nilingkod siya isip gobernador sa Probinsiya sa Sugbo gikan sa tuig 2013 hangtud sa 2019.

Sa iyang open letter ngadto kang Galeos, si Davide nagkanayon nga nasayod siya nga kanunay siya’ng sawayon ug daoton sa kongresista sa mga tapok-tapok sa kalungsoran sa segundo distrito.

Matud ni Davide nga nasayod sila’ng duha ni Galeos nga ang gipanulti sa kongresista dili tinuod.

Ang maong sulat gi-upload usab ni Bise Mayor Orvi Ortega sa iyang Facebook page.

Gipadayag usab ni Davide ang iyang mga nabubo nga mga programa ug proyekto sa ilang distrito.

Lakip niini ang P6 milyones nga gi-download alang sa pagpalit og real property o luna sa Barangay Bogo aron matukoran sa bag-ong Isidro Kintanar Memorial Hospital o Argao District Hospital ug dugang P5 milyones alang sa pagpalambo sa yuta diin gitukod ang maong pasilidad.

Gibutyag ni Davide nga aduna pa’y P70 milyones nga pundo nga ilang nakuha gikan sa Department of Health alang sa pagtukod sa maong health facility.

Si Davide nangangkon nga sa iyang termino isip gobernador kaniadto niabot ngadto sa P100 milyones nga tabang pinansiyal ang nabubo sa Lungsod sa Argao alang sa nagkadaiyang programa ug proyekto apil niini ang P5 milyones nga pagtukod sa merkado sa Brarangy Poblacion ug P200 milyones alang sa pagkonrekto sa dala ug uban pang proyekto.

Apil sa gipadayag ni Davide ang mga proyekto sa probinsiya ubos sa iyang pagdumala mao ang pagkonreto sa Mompeller- Balaas Road section nga nikabat ngadto sa  P90 milyones; pagkonkreto sa Mompeller-Tulang rod section nga nikabat ngadto sa P8 milyones ug pag-upgrade sa dalan sa Barangay Mabasa nga nikabat ngadto sa P7 milyones.

Gawas niini, gipadayag usab ni Davide ang ubang nabubo nga pundo ngadto sa nagkadaiyang lungsod sa ilang distrito lakip niini ag P25 milyones alang sa rehabilitation sa Casa Real ug pagpalambo sa farm to market road sa Barangay Mantalongon, Lungsod sa Dalaguete; P21 milyones alang sa pagpalambo sa Alcoy-Nug-as road section; P17 milyones alang sa pagtukod sa seawall, rehabilitation sa mga pmapubliko nga istraktura sa Lungsod sa Boljoon ug uban pang tabang pinansiyal alang sa mga proyekot sa mga lungsod sa Oslob, Santander ug Samboan.

Matud usab ni Davide nga wala siya maglaom nga i-acknowledge o ilhon kini ni Galeos diin dili ra kini maoy basehan aron botaran sila sa katawhan.

Gipasabot ni Davide nga iyaha lang gitarong og gisaysay ang tinuod. Si Davide niawhag kang Galeos nga mohimo og tinuod nga diskusyon ug motutok sa mga paglambo ug dili ang pagpangdaot.

Sa oras sa pagsulat niining balita padayon pa nga gikuha sa Banat News ang habig ni Galeos kalabot sa maong sulat ni Davide. BDB BANAT NEWS