Paghiusa sa partido KUSUG sa livelihood program sa siyudad gikwestyon

CEBU, Philippines — Gi-call out sa Cebu City Council ang incumbent administration sa giingong pag-integrate niini sa political party nga KUSUG sa pag-apod-apod sa Livelihood Program sa mga barangay atol sa budget hearing sa gisugyot nga P635 milyones nga Supplemental Budget (SB) 1.

Kini atol sa padayong deliberasyon sa konseho sa dakbayan sa SB 1, diin nagsugyot og mga items lakip na ang paggahin alang sa Livelihood Program sa dakbayan.

Si Konsehal Jocelyn Pesquera, Majority Floor Leader ug Vice Chairman sa Committee, maoy unang nipahibawo nga nakadawat sila og kasayuran nga ang pondo alang sa Cebu City Disaster Risk Reduction and Management gi-realign aron suportahan ang pundo sa SB 1, partikular na sa pag-apod-apod sa Livelihood Assistance.

Gihimug-atan ni Pesquera nga kon walay pagtugot sa Disaster Council ug sa konseho sa dakbayan, ang realignment sa maong mga pundo makonsiderar nga technical malversation.

Si Attorney Maru Salvatierra, representante sa executive department, misulti sa konseho nga wala sila makahibalo nga ang mga pondo sa kalamidad gi-realign aron suportahan ang pag-apod-apod sa Livelihood Program. Dugang pa niya nga ang pag-apod-apod sa bugas, usa ka item nga nalakip sa SB 1, kuhaon gikan sa trust fund.

Gibutyag usab ni Salvatierra nga ang ilang “payouts” alang sa Livelihood Program distribution gihimo ubos sa kamanduan sa Office of the Mayor, ug midugang nga ang pondo niini gikan sa regular nga budget sa 2024.

Sa laing bahin, si Wenceslao niingon nga sa miaging budget hearing, nahisgutan nga niabot na sa P270 milyones ang budget appropriation alang sa Livelihood Program distribution.

Gipahibalo usab ni Konsehal Mary Ann de los Santos sa konseho nga adunay “payout” nga gihimo sa Barangay Apas ngadto sa mga benepisyaryo para sa 2024. Nangayo siyag katin-awan sa proseso sa pagpili sa mga benepisyaryo.

Dugang pa niya nga daghang impormasyon ang nakaabot sa iyang opisina kalabot sa distribution guidelines nga gisunod sa Apas, lakip na nga gikinahanglan ang valid ID ug ang mga partisipante gihangyo nga magsul-ob og “anything red.”

Gibutyag usab ni Pesquera nga iyang nakita ang mga forms nga gipang-apod-apod, nga adunay logo sa Cebu City Government ug logo sa partido KUSUG ni Mayor Raymond Alvin Garcia.

Subay niini, “gipahimangnoan” ni Pesquera ang accounting department, kauban ang Department of Social Welfare and Services (DSWS), Barangay Affairs Office (BAO), City Treasurer’s Office (CTO), ug ang Accounting Office. (BANAT NEWS)