Kamatis nibarato, apan sibuyas nimahal

CEBU, Philippines — Cebu City Agriculturist Chief Arliegh Gesta, nikonpirmar nga nikubos ang presyo sa kamatis karon sa kamerkadohan apan nimahal usab ang presyo sa sibuyas bombay.

Padayon ang pagkubos sa presyo sa kamatis sa labing dako nga merkado sa Dakbayan sa Sugbo ang Carbon Public Market nga niabot nalang og P30 ngadto sa P40 ang kilo depende sa kalidad niini.

Matud niya  nidagsa ang daghang supply sa kamatis gikan sa ubang mga dapit sa nasod apil na ang gikan sa Mindanao, apan dili ang abot sa mga mag-uuma sa Sugbu tungod kay sa pagkakaron dili pa tingbuwak sa kamatis dinhi.

Gipaabot nga karong Abril makaani na sab ang mga mag-uuma dinhi sa ilang mga kamates, nagpasabot kini nga abunda ang supply niini gikan karong buwana hangtud sa Abril.

Apan kun ang kamatis nibarato, si Gesta miingon nga grabe ang pagsaka sa presyo sa sibuyas bombay  nga niabot og tag P190 ngadto sa P200 ang kada kilo.

Giklaro ni Gesta nga walay kontrol ang siyudad sa presyo tungod kay gikan man sa uban dapit ang tinubdan niini. Gipadayag ni Gesta, walay tanaman sa sibuyas dinhi sa Sugbu.

Una niini, adunay mga report didto sa kaulohan nga ang mga suppliers niini nanago sa supply sa sibuyas aron mosaka ang presyo. Kun itandi ang sibuyas og bombay, dili mahimong taguon og dugay ang kamatis komparar sa sibuyas.

Si Gesta miingon nga sa kinatibuk-an normal pa ang supply sa mga batakang produkto gikan sa mga mag-uuma dinhi sa Sugbu para sa mga konsumidor.

Sa pikas bahin, gidayeg ni Department of Agriculture (DA) Secretary Francisco “Kiko” P. Tiu Laurel, Jr. ang Junior Chamber International (JCI) Metro Cebu Uptown tungod sa ilang kontribusyon sa komunidad, ilabina sa pagsuporta sa Young Farmers Challenge Program (YFCP), nga nagsilbi nga catalyst sa food security ug inobasyon sa agrikultura.

Sumala sa news release sa DA-7, giila ni Laurel ang grupo atol sa pakighinabi niini sa mga opisyal, lokal ug langyaw nga mga miyembro niini gikan sa Taiwan atol sa ilang ika-40 nga Induction and Turnover Ceremonies nga gipahigayon sa Mandaue City.

Sa maong kalihukan, gidasig ang mga batan-ong lider sa pagpaambit sa ilang kahibalo ug kasinatian ngadto sa mga lokal nga mag-uuma sa pagpasiugda sa agri-entrepreneurship isip usa ka paagi sa financial stability ug pagtubo sa ekonomiya.

“Napaka importante po na matulungan ninyo, lalo na kayong mga kabataan sa pagne-negosyo ang ating mga farmers at fisherfolks na matuto silang magnegosyo para kumita sila at maayos ang kanilang buhay," matud niya. (BANAT NEWS)